भारत – इन्दिरा गान्धी अन्तर्राष्ट्रिय विमानस्थलमा विमानको इन्जिनमा आगलागी हुँदा ६ जना घाइते भएका छन्।
भारतीय सञ्चार माध्यमका अनुसार स्विस अन्तर्राष्ट्रिय विमान सेवाको विमान दिल्लीबाट जुरिखका लागि उडान भर्ने तयारीमा थियो। आइतबार बिहान धावनमार्गमै रहेको बेला इन्जिनमा आगलागी भएपछि उडान स्थगित गरिएको हो।
उक्त विमानमा ४ शिशुसहित चालक दल र यात्रु गरी कुल २३२ जना सवार थिए। आगलागी भएपछि सबै यात्रुलाई तत्काल सुरक्षित रूपमा बाहिर निकालिएको थियो।
घटनामा घाइते भएका ६ जनालाई स्थानीय अस्पतालमा उपचारका लागि भर्ना गरिएको छ। विमानस्थल प्रशासनले घटना लगत्तै पूर्ण आपतकाल घोषणा गरेको थियो।
विमान सेवाका अनुसार चालक दलले सतर्कता अपनाउँदै उडान रोक्ने निर्णय गरेको थियो। घटना सम्बन्धी थप अनुसन्धान जारी रहेको जनाइएको छ।
