सुनसरी – बर्जु गाउँपालिकाले शिक्षा क्षेत्रको दीर्घकालीन सुधारलाई लक्ष्य गर्दै गाउँ शिक्षा योजना (२०८३–२०८८) तर्जुमा प्रक्रिया अघि बढाएको छ।
गाउँपालिकाको शिक्षा, युवा तथा खेलकुद शाखाको आयोजनामा अमाहीबेल्हामा आयोजित सरोकारवालाहरूका लागि अभिमुखीकरण कार्यक्रम आइतबार (आज)सम्पन्न भएको हो।कार्यक्रमको समन्वय तथा व्यवस्थापनमा शिक्षा शाखा अधिकृत हेमराज दाहालको सक्रिय भूमिका रहेको थियो।
कार्यक्रममा सहजकर्ताका रूपमा सहभागी दुर्गा प्रसाद खतिवडा र डिल्लीराम अधिकारीले शिक्षा क्षेत्रको समग्र विकासका लागि योजनाबद्ध कार्य आवश्यक रहेको औंल्याए। उनीहरूले दीर्घकालीन योजना निर्माणमार्फत मात्रै गुणस्तरीय शिक्षा र दिगो सुधार सम्भव हुने धारणा राखे।
गाउँपालिकाले पाँच वर्षे शिक्षा योजना निर्माण गरी शिक्षा क्षेत्रमा नयाँ परिवर्तन ल्याउने लक्ष्य लिएको जनाएको छ। यसअघि २०७९ सालमा विद्यानन्द कोइरालाको नेतृत्वमा गरिएको समीक्षा तथा सुझावलाई समेत आधार बनाइएको बताइएको छ।
गाउँपालिकाका अध्यक्ष जीवछ कुमार रायले शिक्षा विकासका लागि योजनाबद्ध ढंगले अघि बढ्नुपर्नेमा जोड दिँदै योजना सफल कार्यान्वयनका लागि सबै पक्षबीच सहकार्य अपरिहार्य रहेको बताए।
त्यस्तै उपाध्यक्ष नितु कुमारी चौधरी, शिक्षा समितिका सदस्यहरू, विद्यालय व्यवस्थापन समितिका प्रतिनिधि, प्रधानाध्यापक, शिक्षक, अभिभावक तथा अन्य सरोकारवालाहरूको कार्यक्रममा उल्लेख्य सहभागिता रहेको थियो।
सहभागीहरूले गाउँ शिक्षा योजना निर्माणले स्थानीय शिक्षा प्रणालीलाई अझ सुदृढ, व्यवस्थित र प्रभावकारी बनाउने विश्वास व्यक्त गरेका छन्।
