झापा – लागूऔषध दुर्व्यसन र ओसारपसार नियन्त्रणका लागि प्रहरीले सञ्चालन गरेको ‘स्वीप अपरेशन’ क्रममा झापामा दुई दिनमै १२८ जना पक्राउ परेका छन्।जिल्ला प्रहरी कार्यालय झापाले दमकसहित जिल्लाका विभिन्न स्थानमा विशेष प्रहरी परिचालन गरी अभियान सञ्चालन गरेको हो।
सूचना अधिकारी खगेन्द्रबहादुर खड्काका अनुसार शुक्रबार ६२ जना र बिहीबार ६६ जना गरी कुल १२८ जना नियन्त्रणमा लिइएका हुन्। पक्राउ परेकामध्ये लागूऔषधसहित फेला परेका १२ जनामाथि लागूऔषध नियन्त्रण ऐनअनुसार अनुसन्धान भइरहेको छ भने बाँकी ११६ जनामाथि दुर्व्यसनसम्बन्धी अनुसन्धान अघि बढाइएको छ।
अभियानकै क्रममा महेन्द्र राजमार्गअन्तर्गत दमकमा यात्रुवाहक सवारीसाधनका चालक तथा सहचालकको स्वास्थ्य परीक्षण र यान्त्रिक जाँच पनि गरिएको थियो। जाँचका क्रममा ३ जना चालक र २ जना सहचालकले लागूऔषध सेवन गरी सवारी चलाइरहेको पाइएको प्रहरीले जनाएको छ।
त्यस्तै, मदिरा सेवन गरी सवारी चलाएको पुष्टि भएका दुई जना चालकलाई समेत नियन्त्रणमा लिइएको छ।
यसै क्रममा नियन्त्रणमा लिने क्रममा प्रहरीमाथि गालीगलौज र दुर्व्यवहार गरेको आरोपमा पाँच जनाविरुद्ध सार्वजनिक स्थलमा अभद्र व्यवहारको मुद्दा दर्ता गरी अनुसन्धान अघि बढाइएको प्रहरीले जनाएको छ।
