विराटनगर । हरिनगर गाउँपालिकाले आफ्ना ५० भन्दा बढी नागरिकलाई विपद् योद्धा बनाउन चार दिने सामुदायिक विपद् प्रतिकार्य तालिम आयोजना गरेको छ ।
आगलागी, बाढी र डुबानजस्ता विपद् घटनाहरूको रोकथाम तथा व्यवस्थापनसम्बन्धी सैद्धान्तिक र व्यावहारिक दुवै पक्षमा पालिकाले चार दिने तालिम आयोजना गरेको हो ।
मंगलबारदेखि सुरु भएको तालिममा विशेष गरी आगलागीको अवस्थामा उद्धार गर्ने तरिका, आगो नियन्त्रणका प्रारम्भिक उपाय तथा आपतकालीन सावधानीहरूबारे प्रत्यक्ष प्रदर्शन (डेमो) समेत गरिएको थियो ।
सहभागीहरूलाई आगो निभाउने उपकरण चलाउन, सुरक्षित उद्धार प्रक्रिया अपनाउन तथा तत्कालीन प्रतिकार्यका उपायहरू अभ्यास गराइएको थियो, जसमा प्रशिक्षार्थीहरूले केवल कक्षाकोठाको ज्ञान नभई हात हालेर सिक्ने अवसर पाएका थिए ।
समापन कार्यक्रमका बोल्दै हरिनगर गाउँपालिकाका अध्यक्ष गफार अन्सारीले विपद् व्यवस्थापनमा समुदायको सक्रिय भूमिका अत्यन्त महत्त्वपूर्ण रहेको बताए । सरकारी निकाय आइपुग्नुभन्दा पहिले नै समुदाय विपद्का लागि आफैँ तयार हुनुपर्ने उनको धारणा छ ।
कार्यक्रममा बोल्दै प्रमुख प्रशासकीय अधिकृत रोहिनी आचार्य, लघुउद्यम शाखाका राजकुमार मेहता, भुटाहा प्रहरी चौकीका प्रहरी हवल्दार, सेनानी रुपक राई तथा ज्येष्ठ सेनानीहरूको विशेष उपस्थिति रहेको थियो ।
शुक्रबार आयोजित तालिमको समापन समारोहमा सबै सहभागीहरूलाई प्रमाणपत्र वितरण गरिएको थियो । यो तालिमले आफूहरूलाई ज्ञानमात्र नभएर आफ्नो समुदाय आफैँ जोगाउने आत्मविश्वास पनि दिएको प्रशिक्षार्थीले बताएका छन् ।
