काठमाडौं – थापाथलीस्थित बागमती नदी किनारमा बस्दै आएका सुकुमवासीहरूले आफ्नो बस्ती खाली गर्न थालेका छन्।नेपाल सरकारले बस्तीका संरचना भत्काउने तयारी गरेपछि स्थानीयहरू बिहानैदेखि सामान सार्न थालेका हुन्।
बिहीबार साँझ नेपाल प्रहरीले माइकिङ गर्दै बस्ती खाली गर्न सूचना दिएको थियो। यसअघि गृहमन्त्री पदबाट सुदन गुरुङले राजीनामा दिएपछि प्रधानमन्त्री बालेन्द्र शाहले सुरक्षा निकायका प्रमुखहरूलाई बोलाएर बस्ती खाली गराउन निर्देशन दिएका थिए।
प्रधानमन्त्रीको निर्देशनपछि प्रमुख जिल्ला अधिकारी ईश्वरराज पौडैलले जिल्ला सुरक्षा समितिको बैठकमार्फत बस्ती खाली गराउने निर्णय गरेका थिए। उक्त बैठकमा काठमाडौं महानगरकी कार्यवाहक मेयर सुनिता डंगोल सहित सुरक्षा अधिकारीहरू सहभागी थिए।
प्रशासनले पहिलो चरणमा थापाथलीसहित काठमाडौंका ४ वटा सुकुमवासी बस्तीमा डोजर चलाउने जनाएको छ। सूचना पाएपछि केहीले आफैं सामान बोकेर र केहीले गाडीमा राखेर सारिरहेका छन् भने केहीले भने बस्ती नछाड्न अपिल गरिरहेका छन्।
