आइतबार भएको दुर्घटनापछि गम्भीर घाइते भएका लामाको ललितपुरस्थित बीएन्डबी अस्पतालमा उपचारका क्रममा मंगलबार बिहान निधन भएको हो।
उपत्यका ट्राफिक प्रहरी कार्यालयमा कार्यरत लामा आइतबार ड्युटी सकेर घर फर्किने क्रममा काठमाडौंको तारकेश्वर नगरपालिका–८, डाँडागाउँमा ट्रकको ठक्करबाट घाइते भएका थिए। बा.प्रा ०२–०२९ प ९४१५ नम्बरको मोटरसाइकलमा सवार उनलाई बा.प्रा. ०३–००१ ख १७१५ नम्बरको ट्रकले ठक्कर दिएको थियो।
घटनामा संलग्न ट्रक चालक मकवानपुरका ३८ वर्षीय आइतराम मोक्तानलाई प्रहरीले पक्राउ गरिसकेको छ।
रामेछापको लिखु तामाकोसी गाउँपालिका–४ निवासी लामा २०७२ सालमा प्रहरी सेवामा प्रवेश गरेका थिए। उनले सहायक निरीक्षक हुँदै खुला प्रतिस्पर्धाबाट प्रहरी निरीक्षक पद हासिल गरेका थिए।
