नयाँ मूल्यअनुसार ठूलो अण्डा (३० वटा) को फार्म मूल्य ४६५ रुपैयाँ पुगेको छ, जुन यसअघि ४५० रुपैयाँ थियो। यस्तै मझौला अण्डाको मूल्य पनि बढेर प्रतिक्रेट ४१५ रुपैयाँ कायम भएको छ, जुन पहिले ४०० रुपैयाँमा बिक्री हुँदै आएको थियो।
सङ्घका अध्यक्ष विनोद पोखरेलका अनुसार कुखुरामा देखिएको रोग र बढ्दो गर्मीका कारण उत्पादनमा कमी आएको छ। साथै नयाँ वर्षको पूर्वसन्ध्यादेखि पर्यटकीय गतिविधि बढेसँगै अण्डाको माग पनि उच्च भएको छ। सीमा क्षेत्रमा कडाइ गरिएकाले बाहिरबाट अण्डा आयात कम हुनु पनि मूल्य वृद्धिको अर्को कारण बनेको छ।
यद्यपि, हालको मूल्य अझै किसानको लागत मूल्यसम्म पुगेको छैन। उत्पादन लागतअनुसार एक क्रेट अण्डाको लागत करिब ५७४ रुपैयाँ पर्न आउने बताइएको छ। लागतभन्दा कम मूल्यमा बिक्री हुँदा किसान निराश बनेका छन् र आगामी दिनमा मूल्य थप बढ्ने अपेक्षा गरेका छन्।
