काठमाडौँ– आज विश्वभर विश्व अटिजम सचेतना दिवस विभिन्न कार्यक्रम गरी मनाइँदै छ। अटिजम मस्तिष्क विकाससँग सम्बन्धित अवस्था हो, जसले व्यक्तिको व्यवहार, सोचाइ र सञ्चार शैलीमा फरकपन ल्याउँछ।
विशेषज्ञहरूका अनुसार अटिजम भएका व्यक्तिहरूले सामान्यभन्दा पृथक ढंगले व्यवहार गर्ने, बोल्ने र सोच्ने प्रवृत्ति देखाउँछन्। त्यसैले उनीहरूको आवश्यकता र क्षमतालाई बुझेर समावेशी वातावरण निर्माण गर्नुपर्नेमा जोड दिइन्छ।
अटिजम भएका व्यक्तिहरूको गरिमा, अधिकार र समाजमा समान सहभागिता सुनिश्चित गर्नुपर्ने उद्देश्यले संयुक्त राष्ट्रसङ्घ को आह्वानमा सन् २००७ देखि यो दिवस मनाउन सुरु गरिएको हो। यस वर्ष पनि राष्ट्रसङ्घले अटिजम भएका व्यक्तिहरूको योगदानलाई सम्मान गर्दै उनीहरूको अधिकार सुनिश्चित गर्न सदस्य राष्ट्रहरूलाई आग्रह गरेको छ।
यस अवसरमा एन्टोनियो गुटरेस ले सन्देश जारी गर्दै अटिजम भएका व्यक्तिहरूका मानवअधिकार र मौलिक स्वतन्त्रताको पूर्ण कार्यान्वयन गर्नुपर्ने र उनीहरूको समाजमा समान सहभागिता सुनिश्चित गर्न आवश्यक कदम चाल्नुपर्नेमा जोड दिएका छन्।
