काठमाडौं – राष्ट्रिय स्वतन्त्र पार्टी (रास्वपा)का सभापति रवि लामिछाने विरुद्धको सङ्गठित अपराध र सम्पत्ति शुद्धीकरण कसुर फिर्ता लिने निर्णयविरुद्ध दायर रिट निवेदनमा आइतबार सुनुवाइ हुने भएको छ।
सर्वोच्च अदालतमा आज सुनुवाइ नसकिएपछि मुद्दा ‘हेर्दाहेर्दै’मा राख्दै चैत १५ गते आइतबारका लागि पुनः पेसी तोकिएको अदालतका प्रवक्ता अर्जुनप्रसाद कोइरालाले जानकारी दिएका छन्। न्यायाधीशद्वय विनोद शर्मा र अब्दुल अजीज मुसलमानको संयुक्त इजलासमा चैत १० गतेदेखि सुनुवाइ सुरु भए पनि निष्कर्षमा पुग्न नसकेपछि अर्को मितिमा सारिएको हो।
यसअघि न्यायाधीशद्वय सारङ्गा सुवेदी र सुनिलकुमार पोखरेलको इजलासले चैत ५ गते महान्यायाधिवक्ताको संशोधित निर्णय पेश गर्न आदेश दिएको थियो। सविता भण्डारी बराल नेतृत्वको महान्यायाधिवक्ताको कार्यालय ले लामिछानेविरुद्ध लगाइएका सङ्गठित अपराध र सम्पत्ति शुद्धीकरणका मुद्दा फिर्ता लिने निर्णय गरेपछि त्यसविरुद्ध युवराज पौडेल, दिनेश त्रिपाठी र आभास रेग्मीले रिट दायर गरेका थिए।
उक्त मुद्दाको अन्तिम फैसला अब आइतबार हुने सुनुवाइबाट अघि बढ्नेछ, जसलाई राजनीतिक तथा कानुनी रूपमा चासोका साथ हेरिएको छ।
