काठमाडौं । राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) को वर्तमान नेतृत्वलाई निलम्बन गरेको छ।
परिषद्ले बारम्बार दिएको निर्देशन अवज्ञा गरेपछि खेलकुद विकास नियमावली २०७७ को दफा २९ (२) अनुसार एन्फा नेतृत्वमाथि ३ महिनाका लागि निलम्बन गरिएको हो। सो प्रावधानमा परिषद्को निर्देशन पालना नगरेमा सम्बन्धित संघलाई निलम्बन गर्न सकिने व्यवस्था छ।
यससँगै पंकज विक्रम नेम्बाङ नेतृत्वको एन्फा तीन महिनाका लागि निलम्बनमा परेको छ।
एन्फाले कार्यकाल सकिनुभन्दा तीन महिना अघि नै विधानमा व्यवस्था नभएको ‘अर्ली इलेक्सन’ गर्न खोजेपछि विवाद सुरु भएको थियो। राखेपले स्वीकृतिबिना निर्वाचन नगर्न पटक–पटक निर्देशन दिएको भए पनि एन्फाले चैत १३ गते निर्वाचन गर्ने तयारी अघि बढाएको थियो।
राखेपले मंगलबार एन्फालाई २४ घण्टे स्पष्टीकरण माग्दै कारबाही किन नगर्ने भन्ने अल्टिमेटम दिएको थियो। तर एन्फाले निर्वाचन प्रक्रिया नरोकिने जवाफ दिएपछि परिषद्ले निलम्बनको निर्णय गरेको हो।
