लेबनान – लेबनानमा जारी इजरायलको सैन्य कारबाही र सीमावर्ती भिडन्तले गम्भीर मानवीय संकट निम्त्याएको छ। लेबनानी स्वास्थ्य मन्त्रालयका अनुसार मार्च २ देखि सुरु भएको द्वन्द्वमा हालसम्म १ हजार २९ जनाको मृत्यु भइसकेको छ भने २ हजार ७८६ जना घाइते भएका छन्। हताहत हुनेहरूमा ठूलो संख्यामा सर्वसाधारण, विशेष गरी महिला, बालबालिका र स्वास्थ्यकर्मीहरू रहेका छन्।
दक्षिणी लेबनानमा हवाई आक्रमण र जमिनी भिडन्त तीव्र बन्दै गएकाले मृतक र घाइतेको संख्या अझै बढ्न सक्ने चेतावनी दिइएको छ। यसैबीच, इजरायली सेनाले कासिमियाह पुलमा विस्फोट गराएको छ, जसलाई जोसेफ आउनले सम्भावित जमिनी आक्रमणको संकेतका रूपमा व्याख्या गरेका छन्।
युद्धका कारण देशभर ठूलो मात्रामा विस्थापन भएको छ। सरकारी तथ्यांकअनुसार १० लाखभन्दा बढी मानिस घर छोडेर सुरक्षित स्थानतर्फ गएका छन्, जुन कुल जनसंख्याको करिब पाँच भागको एक भाग हो।
विपद् व्यवस्थापन एकाइका अनुसार करिब १ लाख ३४ हजार ३७७ विस्थापितहरू ६२० भन्दा बढी राहत शिविर र आश्रयस्थलहरूमा बसिरहेका छन्। तर अधिकांश शिविरहरू क्षमता भन्दा बढी भरिएका छन् र खाद्यान्न, औषधि तथा आधारभूत सामग्रीको अभाव देखिएको छ। धेरै परिवारहरू अझै पनि आश्रय नपाई सडक, सार्वजनिक स्थल र सवारी साधनमै बस्न बाध्य भएका छन्।
अर्कोतर्फ, इजरायली पक्षकाअनुसार दक्षिण लेबनानमा जारी कारबाहीका क्रममा चार सैनिक सामान्य घाइते भएका छन् भने अन्य घटनामा थप तीन सैनिक घाइते भएका छन्। सबै घाइतेलाई उपचारका लागि अस्पताल भर्ना गरिएको जनाइएको छ। एजेन्सी
