इराकमा अमेरिकी सैन्य विमान दुर्घटना हुँदा चार जनाको ज्यान गएको छ। पश्चिमी इराकमा संयुक्त राज्य अमेरिका सेनाको केसी–१३५ इन्धन वाहक विमान खसेको हो।
दुर्घटनामा चालक दलका चार सदस्यको मृत्यु भएको अमेरिकी सेनाको सेन्ट्रल कमाण्डले जनाएको छ। बिहीबार भएको दुर्घटनामा विमानमा सवार कुल ६ जनामध्ये चार जनाको मृत्यु भएको पुष्टि भएको छ भने बाँकी दुई जनाको खोजी तथा उद्धार कार्य जारी रहेको बताइएको छ।
अमेरिकी सेनाको केन्द्रीय कमान्डका अनुसार दुर्घटना कुनै शत्रुतापूर्ण आक्रमण वा आफ्नै पक्षको अन्जानवश गरिएको प्रहार (फ्रेन्ड्ली फायर) का कारण भएको होइन।
घटनाबारे विस्तृत अनुसन्धान भइरहेको जनाइएको छ। सैन्य नियमअनुसार ज्यान गुमाउने सैनिकहरूको परिचय उनीहरूका परिवारलाई जानकारी गराएको २४ घण्टापछि मात्र सार्वजनिक गरिने बताइएको छ।
