काठमाडौं — गोरखा क्षेत्र नम्बर १ बाट प्रतिनिधि सभा सदस्यमा निर्वाचित सुदन गुरुङले आफ्नो निर्वाचन क्षेत्रका विभिन्न स्थानमा देखिएको टेलिफोन नेटवर्क समस्याको समाधान गर्न माग गर्दै नेपाल टेलिकम लाई ज्ञापनपत्र बुझाएका छन्।
बिहीबार टेलिकमको कार्यालय पुगेर गुरुङले गोरखाका दुर्गम तथा ग्रामीण भेगका नागरिक अझै पनि आधारभूत सञ्चार सेवाबाट वञ्चित रहेको उल्लेख गर्दै यथाशीघ्र नयाँ टावर निर्माण र सेवा विस्तार गर्न ध्यानाकर्षण गराएका हुन्।
गुरुङका अनुसार आरुघाट, फिनाम, माछीखोला, यार्सा, सिरानचोक र ताङज्याङटार लगायतका क्षेत्रमा मोबाइल नेटवर्कको समस्या लामो समयदेखि कायम रहेको छ। ती स्थानमा तत्काल नयाँ टावर जडान गरी गुणस्तरीय सञ्चार सेवा उपलब्ध गराउन उनले माग गरेका छन्।
हालै सम्पन्न प्रतिनिधि सभा सदस्य निर्वाचनमा राष्ट्रिय स्वतन्त्र पार्टी बाट विजयी भएका गुरुङले दुर्गम क्षेत्रमा सञ्चार पहुँच विस्तार गर्नु आफ्नो प्राथमिकतामा रहेको बताएका छन्।
