काठमाडाैँ — नेपाली राष्ट्रिय क्रिकेट टोलीले आज आईसीसी टी–२० विश्वकपको समूह चरणअन्तर्गत तेस्रो खेलमा दुई पटकको विश्व विजेता वेस्ट इन्डिज क्रिकेट टिमसँग प्रतिस्पर्धा गर्दैछ।
मुम्बईस्थित वानखाडे स्टेडियममा हुने खेल नेपाली समयअनुसार बिहान ११:१५ बजे सुरु हुनेछ। प्रारम्भिक दुई खेलमा पराजित भएको नेपालका लागि सुपर एटको झिनो सम्भावना कायम राख्न आजको खेल जित्नैपर्ने दबाब छ। आज हार व्यहोरेमा नेपाल एक खेलअगावै प्रतियोगिताबाट बाहिरिनेछ।
पहिलो खेलमा नेपाल इङ्ल्यान्ड क्रिक्रेट टिम सँग ४ रनले पराजित भए पनि प्रदर्शनको प्रशंसा भएको थियो। दोस्रो खेलमा भने इटाली क्रिक्रेट नेशनल टिमसँग १० विकेटको हार बेहोरेपछि टोलीको आलोचना भएको थियो।
वेस्ट इन्डिजले नेपाललाई पराजित गरेमा एक खेलअघि नै सुपर एटमा स्थान सुरक्षित गर्नेछ। उसले पहिलो खेलमा स्कटल्यान्ड नेशनल क्रिकेट टीमलाई ३५ रनले र दोस्रो खेलमा इंग्ल्यान्डलाई ३० रनले हराएको थियो।
केही महिनाअघि युएईमा भएको तीन खेलको टी–२० शृंखलामा भने वेस्ट इन्डिज नेपालसँग २–१ ले पराजित भएको थियो। त्यसबेला टोलीका कप्तान रहेका अकिल हुसेन र जेसन होल्डर पनि आजको खेलमा मैदान उत्रनेछन्।
नेपालले टी–२० अन्तर्राष्ट्रियमा हराएको एक मात्र टेस्ट राष्ट्र वेस्ट इन्डिज नै हो। समूह ‘सी’ मा लगातार दुई हार बेहोरेको नेपाल अंकविहीन अवस्थामा छ। वेस्ट इन्डिज ४ अंकसहित शीर्ष स्थानमा रहँदा इंग्ल्यान्ड पनि ४ अंकसहित दोस्रो स्थानमा छ। स्कटल्यान्ड २ अंकसहित तेस्रो तथा इटाली २ अंकसहित चौथो स्थानमा छन्।
