काठमाडौं — नेपाल पर्यटन बोर्ड र चलचित्र विकास बोर्डबीच चलचित्र पर्यटनसँग सम्बन्धित कार्यक्रमहरू संयुक्त रूपमा सञ्चालन गर्ने विषयमा समझदारी पत्रमा हस्ताक्षर भएको छ।
बुधबार नेपाल पर्यटन बोर्डमा आयोजित विशेष कार्यक्रममा दुई संस्थाबीच उक्त समझदारी भएको हो। कार्यक्रममा बोल्दै नेपाल पर्यटन बोर्डका प्रमुख कार्यकारी अधिकृत (सीईओ) दीपकराज जोशीले चलचित्रमार्फत नेपालको पर्यटन क्षेत्रमा रहेको ठूलो सम्भावनालाई उजागर गर्न सहकार्यले महत्वपूर्ण भूमिका खेल्ने बताए।
उनले भने, “आजको यो सहकार्यले विभिन्न कार्यक्रम र नीतिमार्फत नेपालको उच्च सम्भावना बोकेको पर्यटन क्षेत्रलाई थप प्रवर्द्धन गर्न मद्दत पुग्नेछ। हामी सबैको साथ र सहयोगको अपेक्षा राखेका छौँ।”
जोशीले नेपाली चलचित्रले पर्यटन प्रवर्द्धनमा उल्लेखनीय योगदान दिन सक्ने उल्लेख गर्दै सिनेमा पर्यटन विस्तारको प्रभावकारी माध्यम भएको बताए। “पर्यटन प्रवर्द्धन नै नेपालको सबैभन्दा शक्तिशाली साधन हो। सिनेमा वा चलचित्रबिना नेपालको पर्यटन सुदृढ हुन सक्दैन। हामीले अन्य देशमा यसको प्रभाव देखिसकेका छौँ,” उनले भने।
कार्यक्रममा चलचित्र विकास बोर्डका अध्यक्ष दिनेश डीसीले सरकारका तर्फबाट समेत पर्यटन प्रवर्द्धनका लागि पहल भइरहेको जानकारी दिए। उनका अनुसार कर्णाली प्रदेश सरकारले एक वर्षका लागि १ करोड रुपैयाँ विनियोजन गरेको छ।
“वर्षमा पाँच वटा चलचित्रलाई २०/२० लाख रुपैयाँ प्रदान गरिनेछ, जसले कर्णाली क्षेत्रमा छायांकन गर्नेछन्। काठमाडौंबाट ३० दिनका लागि जुम्ला जाँदा उत्पादन लागत २०–३० लाख रुपैयाँसम्म फरक पर्न सक्छ,” उनले बताए।
समझदारीसँगै चलचित्रमार्फत पर्यटन प्रवर्द्धन, छायांकन प्रोत्साहन र नीतिगत सहकार्यलाई थप प्रभावकारी बनाउने अपेक्षा गरिएको छ।
