विराटनगर । मोरङको विराटनगर महानगरपालिका वडा नं. २ स्थित जिल्ला ट्राफिक प्रहरी कार्यालयमा ‘सुरक्षित चालक, सभ्य समाज’ भन्ने मूल नारासहित सिटी सफारी (ई–रिक्सा) चालकहरूलाई लक्षित सुरक्षित चालक अभियान कार्यक्रम सम्पन्न भएको छ।
जिल्ला ट्राफिक प्रहरी कार्यालय मोरङको आयोजनामा सम्पन्न कार्यक्रममा जिल्ला प्रहरी कार्यालय मोरङ तथा सवारी चालक अनुमति पत्र प्राप्त सिटी सफारी (ई–रिक्सा) चालकहरू गरी करिब ७०–७५ जनाको सहभागिता रहेको थियो।
कार्यक्रमअन्तर्गत सहभागी चालकहरूले सवारी दुर्घटना न्यूनीकरणसम्बन्धी जिङ्गल बजाउँदै ट्राफिक नियम पालना, अनुशासित र जिम्मेवार सवारी सञ्चालनको सन्देशसहित प्लेकार्ड बोकी बजार परिक्रमा गरेका थिए।
ट्राफिक नियमको पालना गर्दै सुरक्षित समाज निर्माण र सवारी दुर्घटना न्यूनीकरण गर्ने उद्देश्यसहित उक्त कार्यक्रम सम्पन्न गरिएको जिल्ला ट्राफिक प्रहरी कार्यालय मोरङले जनाएको छ।
