काठमाडौं। नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले लोकतन्त्रमाथि प्रहार गर्ने विश्व प्रतिक्रियावादी शक्तिको भूराजनीतिक चलखेल नेपालमा पनि देखिन थालेको बताएका छन्।
सोमबार काठमाडौं निर्वाचन क्षेत्र नं. ५ मा आयोजित पार्टी प्रवेश कार्यक्रममा सम्बोधन गर्दै संयोजक प्रचण्डले सामाजिक सञ्जालमा गरिने स्टन्टका आधारमा विश्व साम्राज्यवादले विभिन्न देशमा भूराजनीतिक खेल खेलिरहेको र त्यसको असर नेपालमा पनि परिरहेको बताएका हुन्।
उनले विचार, राजनीति, सिद्धान्त, इतिहास र विरासत नभएकाहरू सामाजिक सञ्जालकै भरमा लोकप्रिय हुन खोजिरहेको आरोप लगाए। यस्ता प्रवृत्तिको सशक्त प्रतिवादका लागि नयाँ संकल्प, नयाँ समीक्षा र फेरि एकपटक राष्ट्र र जनताप्रति समर्पित भएर अघि बढ्ने तागत आवश्यक रहेको उनले बताए।
‘त्यही तागत सृष्टि गर्ने उद्देश्यले नै नेपाली कम्युनिस्ट पार्टी निर्माण गर्दै अगाडि बढेका हौं,’ प्रचण्डले भने।
संयोजक प्रचण्डले विकास निर्माण, सुशासन, भ्रष्टाचारविरुद्धको संघर्ष, सामाजिक विभेद अन्त्य, सामाजिक न्याय, आर्थिक विकास, उत्पादन र रोजगारी सृष्टिका सवालमा नेकपाले अघि सारेका नीति, योजना र कार्यक्रमप्रति जनताको आशा र भरोसा फेरि बढ्दै गएको दाबी गरे।
उनले अहिलेको युग सामाजिक सञ्जाल र सूचना प्रविधिको भए पनि घर–घरमा पुगेर जनतालाई प्रत्यक्ष बुझाउने तरिका जत्तिको प्रभावकारी अरू नहुने धारणा राखे। हाल नयाँ विचार र सबैभन्दा नयाँ राजनीतिक एजेन्डा बोकेको पार्टी नेकपा मात्रै भएको उनको भनाइ थियो।
कार्यक्रममा एमाले खेलकुद विभागकी सदस्य रेनुका श्रेष्ठ, बैंकर विमला ज्ञवाली, अधिवक्ता सविना वाग्ले, नेकपा (बहुमत) निकट क्रान्तिकारी पत्रकार संघका केन्द्रीय संयोजक जीवन हमाललगायतले नेपाली कम्युनिस्ट पार्टीमा प्रवेश गरेका प्रचण्डको सचिवालयले जनाएको छ।
