काठमाडौं– राष्ट्रिय स्वतन्त्र पार्टी (रास्वपा) का उपसभापति तथा तनहुँ–१ का उम्मेदवार स्वर्णिम वाग्लेले आफूविरुद्ध सामाजिक सञ्जालमा झुटा र भ्रामक सामग्री फैलाइएको भन्दै साइबर ब्युरोमा उजुरी दिएका छन्।
झुटो विवरण तयार गरी आफ्नो मानमर्दन गर्ने र सामाजिक सौहार्दता खल्बल्याउने उद्देश्यले सामग्री प्रचारप्रसार गरिएको आरोप लगाउँदै वाग्लेले त्यस्ता व्यक्ति तथा समूहको पहिचान गरी कडा कारबाही गर्न माग गरेका छन्।
साइबर ब्युरोका एसपी दीपकराज अवस्थीले वाग्लेबाट उजुरी प्राप्त भएको पुष्टि गरेका छन्। उनका अनुसार उजुरीमा सामाजिक सञ्जालमार्फत अफवाह फैलाइएको, नक्कली तथा भ्रामक सामग्री प्रसारण गरिएको र व्यक्तिगत प्रतिष्ठामा गम्भीर आँच पुर्याउने प्रयास भएको उल्लेख छ।
उजुरीमा धर्म र व्यक्तिगत अवस्थाबारे भ्रम सिर्जना गराउने सामग्रीहरू फैलाइएको उल्लेख गर्दै वाग्लेले त्यस्ता गतिविधिमा संलग्न व्यक्ति र समूहमाथि अनुसन्धान गरी हदैसम्मको कारबाही गर्न माग गरेका छन्।
‘सामाजिक सञ्जालमा झुटा र भ्रामक समाचार सिर्जना गरी मानमर्दन तथा सामाजिक सौहार्दता खल्बल्याउने कुनियतले सामग्री प्रचारप्रसार गर्नेहरूलाई पत्ता लगाई हदैसम्मको कारबाही गरिपाऊँ,’ उजुरीमा उल्लेख गरिएको छ।
आफूलाई बागमती प्रदेशकी सांसद भनेर चिनाउने लक्ष्मी घिमिरे र मोहन लामा रूम्बाबाट प्रेषित सामग्रीले आफ्नो प्रतिष्ठामाथि आँच पुर्याउने खराब नियत देखिएको भन्दै वाग्लेले ती सामग्रीहरूप्रति गम्भीर आपत्ति जनाएका छन्।
