काठमाडौं। काठमाडौं उपत्यकामा ट्राफिक व्यवस्थापनलाई थप प्रभावकारी बनाउन उपत्यका ट्राफिक प्रहरी कार्यालयले जथाभावी पार्किङ गरी सवारी आवागमनमा अवरोध सिर्जना गर्ने नौ वटा रात्रिकालीन बसलाई नियन्त्रणमा लिएको छ।
उपत्यकाका विभिन्न स्थानमा आज सञ्चालन गरिएको विशेष जाँच अभियानका क्रममा ती बसहरू नियन्त्रणमा लिइएको उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले जानकारी दिए।
उनका अनुसार नियन्त्रणमा लिइएका बसमध्ये केहीको बाटो इजाजतपत्र (रुट परमिट) को म्याद दुई वर्षसम्म सकिएको पाइएको छ। यस विषयमा यातायात व्यवस्था विभागसँग समन्वय गरी थप प्रक्रिया अगाडि बढाइने उनले बताए।
नियन्त्रणमा लिइएका ती नौ वटा बस हाल उपत्यका ट्राफिक प्रहरी कार्यालय, रामशाहपथमा राखिएको छ। ती बसहरूले सडकमा अनावश्यक जाम सिर्जना गर्नुका साथै यात्रु र अन्य सवारी साधनलाई समेत असहज अवस्था उत्पन्न गराएको ट्राफिक प्रहरीले जनाएको छ।
उपत्यका ट्राफिक प्रहरी कार्यालयका प्रमुख तथा प्रहरी वरिष्ठ उपरीक्षक नवराज अधिकारीले लामो दूरीका रात्रिकालीन सेवा सञ्चालन गर्ने ती बसहरूले तोकिएको गन्तव्यसम्म नगई रुट परमिट विपरीत बाटोमै जथाभावी पार्किङ गरेको पाइएपछि नियन्त्रणमा लिइएको जानकारी दिए।
‘रुट परमिट उल्लङ्घन गरी अव्यवस्थित रूपमा पार्किङ गर्दा सवारी आवागमनमा गम्भीर असर परिरहेको थियो,’ उनले भने, ‘नियन्त्रणमा लिइएका बसलाई यातायात व्यवस्था ऐन, २०४९ अन्तर्गत दफा ७५ र दफा १६० अनुसार कारबाही गरिनेछ।’
यसअघि बुधबार मात्रै ट्राफिक प्रहरीले जथाभावी पार्किङ गरिएका लामो दूरीका १५ रात्रिकालीन बसलाई पनि नियन्त्रणमा लिएको थियो।
