काठमाडौं– आगामी फागुन २१ गते हुने प्रतिनिधिसभा सदस्य निर्वाचनको सुरक्षा प्रयोजनका लागि आजदेखि नेपाली सेना परिचालित भएको छ ।
देशभरका १६५ वटै निर्वाचन क्षेत्रमा निर्वाचनलाई स्वच्छ, स्वतन्त्र, निष्पक्ष र भयरहित वातावरणमा सम्पन्न गराउने उद्देश्यसहित एकीकृत सुरक्षा योजना–२०८२ अनुरूप नेपाली सेनाको संयोजनमा चारवटै सुरक्षा निकाय परिचालन भएका हुन् ।
सुरक्षा व्यवस्थालाई चुस्त, दुरुस्त र प्रभावकारी बनाउने योजनाअनुसार नेपाली सेना, नेपाल प्रहरी, सशस्त्र प्रहरी बल नेपाल तथा राष्ट्रिय अनुसन्धान विभाग एकीकृत रूपमा परिचालित भएका छन् । सुरक्षा योजनाअन्तर्गत निर्वाचन प्रहरी (म्यादी प्रहरी) पनि निर्वाचन सुरक्षामा खटाइनेछ ।
सुरक्षा योजनाअनुसार नेपाल प्रहरी र निर्वाचन प्रहरी मतदानस्थलको भित्री घेराको सुरक्षामा खटिनेछन् भने दोस्रो तहको सुरक्षा घेरामा सशस्त्र प्रहरी बल रहनेछ । बाहिरी सुरक्षा घेराको जिम्मेवारी नेपाली सेनाले सम्हाल्नेछ ।
गत मंसिर ११ गते बसेको मन्त्रिपरिषद् बैठकको सिफारिसमा राष्ट्रपति रामचन्द्र पौडेलले निर्वाचन सुरक्षा व्यवस्थाका लागि नेपाली सेना परिचालन गर्ने स्वीकृति प्रदान गरेका थिए ।
निर्वाचन सुरक्षालाई केन्द्रित गरी आवश्यकताअनुसार सेनाको ‘बेस’ खडा गरिने र संयुक्त गस्तीसमेत सञ्चालन गरिने नेपाली सेनाका प्रवक्ता एवं सहायक रथी राजाराम बस्नेतले जानकारी दिए ।
नेपाली सेनाले प्रतिनिधिसभा सदस्य निर्वाचनका लागि करिब ८० हजार जनशक्ति परिचालन गर्ने जनाएको छ ।
