काठमाडौं । सोमबार नेप्से परिसूचक सामान्य अंकले बढेको छ। नेप्से १.५३ अंकले वृद्धि हुँदै २,६९५.७३ बिन्दुमा पुगेको हो। यसअघि लगातार दुई कारोबार दिन नेप्से क्रमशः १९ र १७ अंकले घटेको थियो।
गत साता १४ अर्ब रुपैयाँभन्दा माथि पुगेको कारोबार रकममा भने पछिल्ला दिनहरूमा निरन्तर गिरावट देखिएको छ। सोमबार एक करोड ७५ लाख सात हजार कित्ता सेयर आठ अर्ब २२ करोड ३९ लाख रुपैयाँ बराबरमा खरिद–बिक्री भएका छन्।
नेप्सेमा सूचीकृत १३ समूहहरूमध्ये पाँच समूहको सूचक बढेको छ भने बाँकी आठ समूह घटेका छन्। होटल तथा पर्यटन र उत्पादन तथा प्रशोधन समूह एक प्रतिशतभन्दा बढीले बढेका छन्। त्यस्तै विकास बैंक, निर्जीवन बिमा र व्यापार समूहमा एक प्रतिशतभन्दा कमको वृद्धि देखिएको छ।
घटेका आठै समूहको सूचक भने एक प्रतिशतभन्दा कमले ओरालो लागेको छ।
सोमबारको कारोबारमा एसवाई प्यानल, श्रीनगर एग्रिटेक र हिमस्टार उर्जाको सेयर मूल्यमा सकारात्मक सर्किट लागेको छ भने मिथिला लघुवित्तको सेयर मूल्यमा नकारात्मक सर्किट लागेको छ।
