काठमाडौं – दिवंगत चलचित्र पत्रकार दिनेश सिटौलाको पार्थिव शरीर श्रद्धाञ्जलीका लागि आज चाबहिलस्थित चलचित्र विकास बोर्डमा राखिने भएको छ।
चलचित्र पत्रकार संघ नेपालका सचिव रघुनाथ सापकोटाका अनुसार सिटौलाको पार्थिव शरीर ग्रान्डी अस्पतालबाट निकालेर चलचित्र विकास बोर्डमा लगिनेछ। आइतबार दिउँसो साढे २ बजेदेखि ३ बजेसम्म श्रद्धाञ्जलीका लागि राखेपछि पार्थिव शरीर अन्त्येष्टिका लागि परिवारको जिम्मा लगाइने उनले जानकारी दिए।
ग्रान्डी अस्पतालले सिटौलालाई आइतबार दिउँसो १२ः४५ बजे मृत घोषित गरेको थियो।
राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहसँग चुनावी प्रचारमा हिँड्दा सिटौला अछाममा अचानक बेहोस भएर ढलेका थिए। त्यसपछि उनलाई नेपाली सेनाको हेलिकोप्टरमार्फत सुर्खेत ल्याइयो र त्यहाँबाट स्काई ट्रकमार्फत काठमाडौं ल्याएर ग्रान्डी अस्पतालमा भर्ना गरिएको थियो।
४५ वर्षीय सिटौला चलचित्र पत्रकार संघ नेपालका पूर्वअध्यक्ष हुन्। पछिल्लो समय उनी फिल्महरूको मिडिया संयोजकका रूपमा सक्रिय थिए भने ‘सिने अनलाइन’ पनि सञ्चालन गर्दै आएका थिए।
