वीरगञ्ज । चालु आर्थिक वर्षको पहिलो छ महिनामा वीरगञ्ज नाका हुँदै १६ थरिका खाद्य पदार्थ रु ११ अर्ब ५७ करोड मूल्यमा आयात भएको छ।
गत आर्थिक वर्षको सोही अवधिको तुलनामा चालु आवको पहिलो छ महिनामा खाद्य पदार्थको आयातमा रु २१ करोडको गिरावट आएको वीरगञ्ज भन्सार कार्यालयले जनाएको छ। भन्सार कार्यालयका सूचना अधिकारी उदयसिंह विष्टका अनुसार अघिल्लो आवको तुलनामा यस वर्ष खाद्य पदार्थको आयातमा सामान्य कमी देखिएको हो।
गत आर्थिक वर्षको पहिलो छ महिनामा वीरगञ्ज नाका हुँदै १६ थरिका खाद्य पदार्थ रु ११ अर्ब ७८ करोड मूल्यमा आयात भएको थियो।
चालु आर्थिक वर्षको पहिलो छ महिनामा रु ५ अर्ब ६८ करोड मूल्य बराबरको १५ करोड ४३ लाख किलोग्राम धान आयात भएको छ। जबकि, गत आर्थिक वर्षको सोही अवधिमा रु ६ अर्ब ९ करोड मूल्यको धान आयात भएको थियो।
यस्तै, चालु आवको पहिलो छ महिनामा रु ३ अर्ब ४१ करोड मूल्यको मकै आयात भएको छ। त्यस्तै रु १ अर्ब ६१ करोड मूल्यको चामल र रु ३३ करोड मूल्यको माल्ट आयात गरिएको छ।
यस अवधिमा रु २३ करोड ७३ लाख मूल्य बराबरको फापर, कोदो तथा अन्य खाद्यान्न पनि आयात भएको भन्सार कार्यालयले जनाएको छ।
