धनकुटा। कोशी लोकमार्गअन्तर्गत धनकुटाको छथर जोरपाटी गाउँपालिका–२ र धनकुटा नगरपालिका–१ को सिमाना पर्ने त्रिशुलेमा यात्रुवाहक बस दुर्घटना हुँदा ६ जना घाइते भएका छन्।
तेह्रथुमबाट धरानतर्फ जाँदै गरेको को १ ख ५१०५ नम्बरको बस अनियन्त्रित भई सडकबाट करिब ७ मिटर तल पल्टिँदा दुर्घटना भएको हो।
दुर्घटनामा घाइते हुनेमा तेह्रथुमको लालिगुराँस नगरपालिका–२ का ५३ वर्षीय रेवान्तकुमार कामी, २३ वर्षीय रविन लिम्बू, २२ वर्षीय राज लिम्बू, धनकुटाको छथर जोरपाटी गाउँपालिका–५ की २८ वर्षीया मुना रुचाल, उनका ५ वर्षीय छोरा निक्खि रुचाल तथा सुनसरीको धरान उपमहानगरपालिका–५ की ४७ वर्षीया चन्द्रकला लिम्बू रहेका छन्।
धनकुटा प्रहरीका प्रवक्ता ज्ञानकुमार महतोका अनुसार बसमा १५ जना यात्रु सवार थिए, जसमध्ये ६ जना घाइते भएका हुन्।
घाइतेहरूको उद्धार गरी धनकुटा–१ स्थित हिले उज्यालो सामुदायिक पोलिक्लिनिकमा उपचारका लागि पठाइएको प्रहरीले जनाएको छ।
