इटहरी । सुनसरीको भोक्राहा नरसिंह गाउँपालिका–४ स्थित श्री पृथ्वीनारायण माध्यमिक विद्यालय परीक्षा केन्द्रबाट एक नक्कली परीक्षार्थी पक्राउ परेकी छन्।
जिल्ला प्रहरी कार्यालय सुनसरीका अनुसार हरिनगर–६ की २० वर्षीया नुसरत खातुनलाई माध्यमिक शिक्षा परीक्षा (एसइई) दिँदै गरेको अवस्थामा नियन्त्रणमा लिइएको हो।
प्रहरी उपरीक्षक केशव थेबेका अनुसार खातुनले आफ्नै भाउजु सलमा अजहरको नाममा जारी गरिएको प्रवेशपत्र प्रयोग गरेर परीक्षा दिइरहेको पाइएपछि पक्राउ गरिएको हो । उनी पहिलो दिनदेखि नै निरन्तर परीक्षा दिँदै आएकी थिइन् । उनलाई मंगलबार मात्रै नियन्त्रणमा लिइएको प्रहरीले जनाएको छ।
भोक्राहा–२ स्थित जामिया इस्लामिया मदरसामा कक्षा १० मा अध्ययनरत सलमा अजहर हाल कतारमा रहेको खुलेको छ। नक्कली परीक्षार्थी बनेर परीक्षा दिनु शिक्षा ऐनविपरीत भएकाले खातुनमाथि सोहीअनुसार कानुनी कारबाही गरिने सुनसरीका प्रमुख जिल्ला अधिकारी वासुदेव घिमिरेले बताएका छन्।
