काठमाडौं । सर्वोच्च अदालतले दीपक खड्का लाई थुनामै राख्न आदेश दिएको छ।खड्काकी श्रीमती विनिता थापा ले दायर गरेको बन्दीप्रत्यक्षीकरण रिटमाथि सुनुवाइ गर्दै न्यायाधीशद्वय तिलप्रसाद श्रेष्ठ र शान्तिसिंह थापा को इजलासले यस्तो आदेश दिएको हो।
रिटमाथि आज वरिष्ठ अधिवक्ताहरू सुशीलकुमार पन्त, शम्भु थापा, उपेन्द्रकेशरी न्यौपाने, सतिष्कृष्ण खरेल तथा अधिवक्ता प्रकाश रेग्मी ले बहस गरेका थिए। सरकारी पक्षबाट नायव महान्यायाधिवक्ता सञ्जिवराज रेग्मी र उपन्यायाधिवक्ता दशरथ पंगेनी ले बहस गरेका थिए।
सर्वोच्चले उक्त मुद्दाको पेसी भोलि (वैशाख ३ गते) का लागि तोकेको छ। आदेशमा “निवेदकलाई हाल जे जुन अवस्थामा छन्, यथास्थितिमा राख्नू” भनी विपक्षीहरूका नाममा निर्देशन दिइएको उल्लेख छ।
खड्कालाई प्रहरीले चैत १५ गते पक्राउ गरेको थियो। पूर्व ऊर्जा, जलस्रोत तथा सिँचाइमन्त्री समेत रहेका उनलाई सुधन गुरुङ ले भदौ २४ गतेको ‘जेनजी आन्दोलन’सँग जोडिएको घटनामा घरमा बरामद भएको रकमको अनुसन्धानका लागि नियन्त्रणमा लिइएको बताएका थिए।
खड्काको घरमा आगजनीपछि जलेको अवस्थामा भेटिएको रकमबारे सम्पत्ति शुद्धीकरण अनुसन्धान विभाग ले अनुसन्धान गरिरहेको छ। विभागले घरबाट जलेका नोटका टुक्रा र वरपरको खरानीसमेत संकलन गरिसकेको छ।
उक्त ‘जेनजी आन्दोलन’का क्रममा प्रदर्शनकारीहरूले खड्काको घरमा तोडफोड तथा आगजनी गरेका थिए। आगलागीपछि नेपाली तथा विदेशी मुद्रा जलेको भिडियो सामाजिक सञ्जालमा सार्वजनिक भएका थिए भने केही सग्ला नोट प्रदर्शनकारीले लगेका दृश्यहरू पनि सार्वजनिक भएका थिए।
