सरकारी प्रतिबद्धतापत्रको ‘अन्तर्राष्ट्रिय कूटनीति र परराष्ट्र सम्बन्ध’ शीर्षकअन्तर्गत नेपाललाई ‘बफर स्टेट’ बाट ‘भाइब्रेन्ट ब्रिज’ मा रूपान्तरण गर्ने र ‘समनिकटता’ को नीति अवलम्बन गर्ने उल्लेख छ। यही सन्दर्भमा ज्ञवालीले सरकारी दस्ताबेजमा शब्द चयन गर्दा अत्यन्त सावधानी अपनाउनुपर्ने बताएका छन्।
उनले अन्तर्राष्ट्रिय कूटनीतिमा प्रत्येक शब्दको गहिरो अर्थ हुने उल्लेख गर्दै नेपालले आफूलाई कहिल्यै ‘बफर राज्य’का रूपमा परिभाषित नगरेको स्पष्ट पारे। उनका अनुसार नेपालका छिमेकी राष्ट्रहरूबीच यस्तो शत्रुतापूर्ण अवस्था पनि छैन जसले यस्तो शब्द प्रयोगलाई औचित्य दिन सकोस्।
ज्ञवालीले ‘समनिकटता’ र ‘समदूरी’ जस्ता अवधारणाप्रति पनि असहमति जनाउँदै राष्ट्रिय हित, स्वतन्त्र परराष्ट्र नीति र सन्तुलित सम्बन्धलाई प्राथमिकता दिनुपर्ने बताए। उनका अनुसार विभिन्न सन्दर्भ, मुद्दा र साझेदारीअनुसार अन्तर्राष्ट्रिय सम्बन्धको स्वरूप फरक हुन सक्छ।
सरकारी दस्ताबेजमा अस्पष्ट वा विवादास्पद शब्द प्रयोग गर्नुको सट्टा स्पष्ट, सन्तुलित र राष्ट्रिय हित केन्द्रित कूटनीतिक भाषा प्रयोग गर्नुपर्नेमा उनले जोड दिएका छन्।
