काठमाडौं – सशस्त्र प्रहरी महानिरीक्षक राजु अर्यालले आगामी फागुन २१ गते हुने प्रतिनिधिसभा सदस्य निर्वाचन सुरक्षामा कुनै पनि कमीकमजोरी नगरी कार्य गर्न सशस्त्र प्रहरी कर्मचारीलाई निर्देशन दिएका छन्।
सोमबार सशस्त्र प्रहरी बल नेपाल प्रधान कार्यालयमा विभिन्न कार्यालय प्रमुखको जिम्मेवारीमा खटिन लागेका अधिकृतलाई सम्बोधन गर्दै महानिरीक्षक अर्यालले आमनागरिकलाई सुरक्षाको प्रत्याभूति दिलाउने उद्देश्यसहित प्रभावकारी रूपमा काम गर्न जोड दिएका छन्।
उनले उच्च व्यावसायिक प्रदर्शन गर्न र निर्वाचन लक्षित सुरक्षा कारबाहीलाई तीव्र रूपमा कार्यान्वयन गर्दै भयरहित वातावरणमा निर्वाचन सम्पन्न गराउन निर्देशन दिएका छन्। कमजोर कमाण्ड र गल्ती गर्ने कमाण्डर माथि तत्काल कारबाही गरिने चेतावनी दिँदै उनले सबैलाई उच्च मनोबलका साथ काम गर्न आग्रह गरे।
महानिरीक्षक अर्यालले कमाण्डको जिम्मेवारीमा खटिन लागेका अधिकृतले पदीय जिम्मेवारीमा रहँदा बदमासी गरेमा तत्काल कारबाही हुने स्पष्ट पारेका छन्। निर्वाचन सफल बनाउन मातहत कर्मचारीले निर्वाचन आचारसंहिताको पूर्ण रूपमा पालना गर्दै परिचालित हुनुपर्ने उनको निर्देशन रह्यो।
साथै उनले सङ्गठनले लिएको नीति अनुसार कार्यक्षेत्रमा सक्रियताका साथ परिचालन हुनुपर्नेमा जोड दिंदै, राजस्व चुहावट नियन्त्रणलाई प्रभावकारी बनाउनेतर्फ केन्द्रित हुनुपर्ने बताए।
महानिरीक्षक अर्यालले सशस्त्र प्रहरी बलका सम्पूर्ण इकाइलाई आर्थिक पारदर्शिता कायम राख्दै भ्रष्टाचारमा शून्य सहनशीलताका साथ कार्य गर्न निर्देशन दिँदै, सीमामा खटिँदा गस्ती, पेट्रोल र अप्रेशनल कामकारबाही थप प्रभावकारी बनाइराख्न आग्रह गरे।
