काठमाडौं – आफ्नो उम्मेदवारी खारेजी गर्ने निर्वाचन आयोगको निर्णयविरुद्ध नागरिक उन्मुक्ति पार्टी, नेपालका अध्यक्ष रेशमलाल चौधरीले दायर गरेको रिटमा सर्वोच्च अदालतले कारण देखाऊ आदेश जारी गरेको छ।
आइतबार रिटमाथि सुनुवाइ गर्दै सर्वोच्चका न्यायाधीश बालकृष्ण ढकालको इजलासले निर्वाचन अधिकृत र सम्बन्धित निकायसँग कारण देखाऊ आदेश जारी गरेको हो। चौधरीले निर्वाचन अधिकृतले गैरकानुनी रूपमा आफ्नो उम्मेदवारी रद्द गरेको दाबी गर्दै निर्वाचन अधिकृतको कार्यालय तथा कैलाली निर्वाचन क्षेत्र नम्बर २ का निर्वाचन अधिकृतको निर्णय बदर हुनुपर्ने माग गरेका छन्।
रिटमा उनले आफ्नो उम्मेदवारी यथावत राखी निर्वाचनमा प्रतिस्पर्धा गर्न पाउनुपर्ने मागसमेत गरेका छन्। प्रारम्भिक सुनुवाइपछि सर्वोच्च अदालतले अन्तरिम आदेश जारी गर्नुपर्ने वा नपर्ने विषयमा छलफल गर्न विपक्षी पक्षलाई समेत बोलाएको छ।
