खोटाङ र उदयपुर जिल्लालाई जोड्ने सुनकोशी नदीस्थित धाप्लाङघाटमा निर्माणाधीन पक्की पुलले पछिल्लो समय गति लिएको छ।
कोशी प्रदेशका निवर्तमान भौतिक पूर्वाधार मन्त्री भूपेन्द्र राईको सक्रियतापछि लामो समयदेखि अलपत्र परेको पुल निर्माणले तीव्रता पाएको हो।
राईको गृह जिल्ला खोटाङ नै भएकाले उनले पुल निर्माणप्रति विशेष चासो देखाउँदै आवश्यक समन्वय र पहल गरिरहेका छन्। स्थानीय तहदेखि निर्माण कम्पनीसम्मको समन्वयका कारण हाल काम अघि बढिरहेको जनाइएको छ।
रसुवा एसएनएस पप्पु जेभीले ठेक्का लिएको उक्त पुलको २०७४ साल भदौ ३१ गते तत्कालीन प्रधानमन्त्री तथा नेपाली कांग्रेसका सभापति शेरबहादुर देउवाले शिलान्यास गरेका थिए। सम्झौता अनुसार २०७६ सालभित्रै निर्माण सम्पन्न गर्नुपर्ने भए पनि विभिन्न कारणले हालसम्म पुल निर्माण पूरा हुन सकेको छैन।
लामो समयदेखि पुल नबन्दा खोटाङ र उदयपुरका स्थानीयले सास्ती भोग्दै आएका छन्। पुल निर्माण सम्पन्न भएपछि दुवै जिल्लाबीच आवागमन सहज हुने, व्यापारिक गतिविधि बढ्ने र स्थानीयको दैनिक जीवनमा ठूलो राहत पुग्ने अपेक्षा गरिएको छ।
