झोराहाट । ग्रामथानमा उत्कृष्ट कहलिएको जनक मेमारियल बोर्डिङ स्कुलकी छात्रा दीया खतिवडा कवियत्री आइडल घोषित् भएकी छन् । ‘स्वाभिमान’ शीर्षकमा विद्यालयले आयोजना गरेको अन्तर कक्षा कविता प्रतियोगिताकी दिया अन्य ५९ प्रतिस्पर्धीहरूलाई उछिन्दै कवियत्री आइडल घोषित् भएकी हुन् ।
ग्रामथान गाउँपालिका-२ झोराहाटमा अवस्थित स्कुलले बिहीबार आयोजना गरेको अन्तिम चरणको प्रतियोगितामा शीर्ष १० जनामध्येबाट ११४ अंक पाउँदै दिया सर्वोत्कृष्ट बन्दै प्रथम बन्दा ११३ अंकका साथ कृति विश्वास दोस्रो बनिन् । यसैगरी, १११ अंक ल्याएकी यशोदा अधिकारीले तेस्रो स्थान हासिल गरिन् । प्रथम, द्वितीय र तृतीय स्थान हासिल गरेका यी तीनै छात्रा जनकको कक्षा १० मा अध्ययनरत छन् ।
कक्षा ५ देखि १० सम्मका ६० जना विद्यार्थीहरूले भाग लिएको प्रतियोगिताको फाइनलमा वरिष्ठ साहित्यकार भरत गुरागाईं ‘बर्बरिक’ तथा शिक्षिकाद्वय निर्मला भण्डारी र हिमा कार्कीले निर्णायकको भूमिका बहन गरेका थिए । कार्यक्रममा कवि बर्बरिकले आमा र कैली गाई शीर्षकको कविता वाचन गरेर मन्त्रमुग्ध बनाएका थिए भने प्रतियोगी कविहरूले पनि कविता प्रस्तुत गरेका थिए ।
प्रतियोगिताको विजेता बनेर जनक कवियत्री आइडल बन्न सफल दियालाई कार्यक्रममा उपस्थित रहेका जय मिडिया म्यानेजमेन्टका जय रोयले पुरस्कारस्वरूप नगद रु पाँच सय रुपैयाँ प्रदान गरेका थिए । विद्यालयले भने विजेता कविहरूलाई चाँडै नै अर्को कार्यक्रमको आयोजना गरी पुरस्कृत गर्ने जानकारी दिएको छ ।
कार्यक्रममा बोल्दै मुख्य निर्णायक बर्बरिकले जनकका विद्यार्थीहरूले सशक्त कविता वाचन गरेर मन्त्रमुग्ध बनाएको बताए । यस्ता कार्यक्रमबाट विद्यार्थीभित्र लुकेको प्रतिभा प्रष्फुटन हुनेमा कुनै दुईमत नरहेको उनको भनाइ छ ।
यसैगरी, स्कुलका प्रिन्सिपल तथा कार्यक्रमका सभापति सुनीलकुमार भगतले जनकका विद्यार्थीहरूले पठनपाठनसँगै खेलकुदमा मात्र नभएर साहित्य विधामा पनि आफूहरू उत्कृष्ट सावित गरेको बताए । यी र यस्ता कार्यक्रमहरूले नै जनक विद्यालय ग्रामथानमा उत्कृष्ट कहलिएको भनाइ प्रिन्सिपल भगतको छ ।
कार्यक्रममा विद्यालयका लेखा प्रमुख आलोक अधिकारी, व्यवस्थापक सुखाराम माझी, कोअर्डिनेटर ज्योतिप्रसाद धिताल, भाइस प्रिन्सिपल समुन्द्र पराजुली, सञ्चालक सदस्यहरू सुरेन्द्र भगत, यमन सरदार र शिक्षक–शिक्षिकाहरूको उपस्थिति रहेको थियो । कार्यक्रमको सञ्चालन भने शिक्षक धीरेन्द्रकुमार खवासले गरेका थिए ।
