विराटनगर । गत भदौ ४ गते कुवेतमा मृत्यु भएका धनकुटाको महालक्ष्मी नगरपालिका–१ कटहरे, सिप्रिङका डम्बरबहादुर मगरको बिहीबार अन्त्येष्टि गरिएको छ ।
धनकुटाका महालक्ष्मी नगरपालिका–४, दमारस्थित अरुण नदी किनारमा अन्त्येष्टि गरिएको हो ।
मगरको शवलाई उनका दुई छोरीले दागबत्ती दिए । गत १३ गते महालक्ष्मी नगरपालिकाले मगरको शव नेपाल झिकाउन कागजात पठाएको थियो ।
श्रीमानको मृत्युको खबर सुनेर विद्या मगरको भदौ ७ गते मृत्यु भयो ।
पारिवारिक स्रोतका अनुसार कुवेतमा भएको विषाक्त मदिरा सेवनको घटनामा पर्नु भएको थियो । विषाक्त मदिरा सेवनबाट गम्भीर बिरामी परेका मगरको उपचारको क्रममा भदौ ४ गते मृत्यु भएको खबर आएको थियो ।
श्रीमानको मृत्युले विक्षिप्त बनेकी विद्या भदौ ७ गते एकाएक बेहोस भइन् ।
उपचारका लागि जितपुर नगर अस्पताल पु¥याउनसाथ अस्पतालले विद्यालाई मृत घोषित गरिदिएको विद्याका दाजु गणेश मगरले जानकारी दिए ।
छोरीहरूले सोही दिन दमारस्थित अरुण नदी किनारमा आमाको शवको अन्त्येष्टि गरेका थिए ।
मगर जातिको संस्कृति अनुसार उन छोरीहरूले सात दिन काममा बसेर १३ गते आमाको काम सकी बुवाको शव पर्खिएर बसेको स्थानीय पदम रखालले जानकारी दिए ।
उनीहरूले १२ दिनको अन्तरालमा आमा र बुवाको शवलाई दागबत्ती दिनुपरेको छ ।
कुवेतबाट बुधबार मगरको शव काठमाडौँ आइपुगेको र काठमाडौँबाट बिहीबार नै शव धनकुटा आइपुगेको महालक्ष्मी नगरपालिकाका रोजगार शाखा प्रमुख गौरव कार्कीले जानकारी दिए ।
डम्बर दुई वर्षअघि २०८० असारमा वैदेशिक रोजगारीमा कुवेत पुगेका थिए ।
श्रीमती विद्या भने धनकुटामै छोरीसँगै बस्दै आएकी थिइन् । मगर दम्पतीका तीन छोरी छन् ।
उनीहरू एक्कासि बाबुआमाविहीन बन्न पुगेका छन् । १६ वर्षीय जेठी छोरी विपना मगर धनकुटा सदरमुकामस्थित गोकुण्डेश्वर बालमन्दिरमा कक्षा १२ मा अध्ययनरत छिन् ।
माहिली छोरी १५ वर्षीय मञ्जु मगर पनि सोही विद्यालयमा कक्षा ११ मा अध्ययनरत छिन् ।
कान्छी छोरी समिता मगर दुई वर्षकी छिन् ।
श्रीमान्/श्रीमतीको तीन दिनको अन्तरालमा भएको मृत्युले परिवार आफन्त मात्र नभई गाउँ नै शोकाकुल भएको छ ।
सामान्य आर्थिक अवस्था रहेको मगर दम्पतीको मृत्युपछि छोराछोरीको लालनपालन र हेरचाहका लागि अहिले सहयोग सङ्कलन गर्ने काम भइरहेको स्थानीय विमला थापाले जानकारी दिइन् ।
माहिली छोरी १५ वर्षीय मञ्जु मगरको नाममा बैंकमा खाता खोलेर सहयोग संकलन सुरु गरिएको हो ।
महालक्ष्मी नगरपालिकाले बालबालिकाको शिक्षामा लाग्ने खर्च सबै पालिकाले बेहोर्ने जनाएको छ ।
मेयर ध्रुवराज रायका अनुसार पढाइ खर्चबाहेक अन्य सहयोग गर्न पालिका तत्पर रहेको छ ।
