विराटनगर । कोशी प्रदेशको राजधानी विराटनगरमा किरियापुत्रीमा कुटपिट गर्ने दुई जना पक्राउ परेका छन् ।
विराटनगर महानगरपालिका–११ स्थित पिचरामा किरिया गर्न बसिरहेका परिवारमाथि सोमबार कुटपिट भएको थियो ।
कुटपिटबाट किरिया गर्न बसिरहेका हरिनारायण कामत र उनका छोराहरू किरण कामत, सन्तोष कामत, छोरी काली कामत घाइते भएका छन् ।
कुटपिटको आरोपमा मोरङ प्रहरीले विराटनगर महानगरपालिका–११ का २७ वर्षीय प्रमोद सहनी र २९ वर्षीय सुनिल सहनीलाई पक्राउ गरेको छ ।
किरियापुत्रीलाई सोमबार राति कुटपिट गरेपछि पीडित परिवारले मंगलबार जिल्ला प्रहरी कार्यालयमा उजुरी दिएको थियो ।
पीडित पक्षको उजुरीका आधारमा आरोपितलाई अनुसन्धानका लागि पक्राउ गरिएको जिल्ला प्रहरी कार्यालयकी प्रवक्ता प्रहरी नायब उपरीक्षक कोपिला चुडाँलले जानकारी दिइन् ।
