महामन्त्रीदेखि प्रधानमन्त्रीसम्मले रविलाई धम्क्याउन थालेपछि उच्च पुगेको निकिताको आरोप

विराटनगर । राष्ट्रिय स्वतन्त्र पार्टी (रास्वपा)का सभापति रवि लामिछानेकी श्रीमती निकिता पौडेलले महामन्त्रीदेखि प्रधानमन्त्रीसम्मले रविलाई धम्क्याउन थालेपछि उच्च पुगेको आरोप लगाएकी छन् ।

रविलाई थुनामै पठाउने जिल्ला अदालत रुपन्देहीको आदेशविरुद्ध सोमबार उच्च अदालतमा रिट निवेदन दर्ता गराएकी निकिताले यस्तो आरोप लगाएकी हुन् ।

जिल्ला अदालत रुपन्देहीका न्यायाधीश नारायणप्रसाद सापकोटाको इजलासले लामिछानेलाई थुनामै राखेर अनुसन्धान अघि बढाउन आदेश जारी गरेको थियो ।

उक्त आदेशविरुद्ध सोमबार उच्च अदालत तुलसीपुरको बुटवल इजलासमा रिट निवेदन दर्ता गराएपछि निकिताले महामन्त्रीदेखि प्रधानमन्त्रीसम्मले रविलाई धम्क्याउन थालेपछि उच्च पुगेको बताएकी हुन् ।

जिल्ला अदालत रुपन्देहीले बैंक जमानतमा रिहा गर्न अस्विकार गरेपछि सोमबार उच्च अदालत दाङको बुटवल इजलासमा निवेदन लिएर पुगेका छन् ।

जिल्ला अदालतले साउन २६ गते बैंक जमानत बुझाउँदा पनि थुनामै राख्ने आदेश दिएको थियो । सो आदेशविरुद्ध पूर्वगृहमन्त्रीसमेत रहेका लामिछाने उनकी पत्नी निकिता पौडेलमार्फत् उच्च अदालत पुगेका हुन् ।

उच्च अदालत, बुटवलका शाखा अधिकृत तथा सूचना अधिकारी रामबहादुर कुँवरले लामिछानेले जिल्ला अदालतको आदेशमा चित्त नबुझेको भन्दै निवेदन दर्ता गराएको जानकारी दिए ।

निवेदन दर्ता गराएपछि निकिता पौडेलले सामाजिक सञ्जालमार्फत् प्रतिक्रिया दिँदै न्यायका ढोका ढक्ढक्याउन आफू दृढ रहेको बताएकी छन् ।

‘मेरो श्रीमान् भन्नुहुन्छ, यो देशमा शक्ति पृथकीकरण समाप्त भएको धेरै भइसक्यो,’ उनले भनेकी छन्, ‘एउटै रावणका फरक टाउका गन्न छाडिदेऊ । तर, म श्रीमतीका रूपमा जिद्धि छु, संविधान र कानुनले अनुमति दिएका देशभित्र र बाहिरका न्यायका हरेक ढोका ढक्ढक्याउनेछु ।’