प्रतिपक्षी राष्ट्रिय प्रजातन्त्र पार्टी (राप्रपा)लेसंवैधनिक परिषद्मा बहुमत नपुगेपछि उपसभामुख इन्दिरा रानामगरलाई हटाउन सत्तापक्षले हस्ताक्षर संकलन गरेको भन्दै आपत्ति जनाएको छ ।
प्रतिनिधिसभाको मंगलबारको बैठकमा राप्रपा सांसद सांसद डा. रोशन कार्कीले कांग्रेस–एमालेमाथि संवैधानिक परिषद्मा बहुमत पुर्याउन उपसभामुख रानामगरलाई हटाउने प्रयासस्वरूप हस्ताक्षर संकलन गरिएको भन्दै आपत्ति जनाइन् ।
‘हिजो दिनभर नौटंकी देखियो । एमाले र नेपाली कांग्रेसहरूले आफना् माननीयज्यूहरूलाई खाली कागजमा सही गराएको भन्ने खबर सुनियो । यो के को लागि भन्दा उपसभामुखलाई महाअभियोग लगाउने रे,’ उनले भनिन्, ‘उहाँहरूलाई संवैधनिक परिषद्मा बहुमत पुगेन । बहुमत पुर्याएर आसेपासेलाई नियुक्तिका लागि उपसभामुखमाथि महाअभियोग लगाउने कुरा चल्यो । कांग्रेस र एमालेले आफ्ना सांसदहरूलाई खाली कागजमा सही गराएका छन् । सही गराउने कस्तो पार्टी ? सही गर्ने कस्ता माननीयहरू ? धिक्कार होस् ।’
सांसद कार्कीले भिजिट भिसा प्रकरणमा मुछिएका गृहमन्त्री रमेश लेखकलाई कांग्रेस–एमालेले संरक्षण गरेको पनि आरोप लगाइन् ।
‘आफ्ना गृहमन्त्री जो भिजिट भिसामा धन्दा गरिराख्नुभएको छ, कमाउने भाँडो बनाउनुभएको छ,’ उनले भनिन्, ‘त्यसलाई चाहिँ बचाउने ।’
त्यसपछि अघिल्लो बैठकमा झैँ रास्वपा र राष्ट्रिय प्रजातन्त्र पार्टी संसद् बैठक बहिष्कार गरेका छन् ।
