दक्षिण प्रशान्त क्षेत्रमा अवस्थित टापु राष्ट्र फिजीले भारतको सहयोगमा नयाँ अस्पताल निर्माण गर्ने भएको छ । फिजीका उपप्रधान एवम् अर्थमन्त्री प्राध्यापक विमन प्रसादले भारतको सहयोगमा १ सय शैय्याको विशेषज्ञ अस्पतालको निर्माणकार्य चाँडै शुरु हुने बताएका हुन् ।
फिजीको राजधानी सुभामा आयोजित ट्रेड युनियन कंग्रेसको सम्मेलनलाई सम्बोधन गर्दै मन्त्री प्रसादले पछिल्लो समय आफ्नो मुलुकमा स्वास्थ्य उपचारको अवस्था अझ खराब बन्दै गएको स्वीकार गरे । अहिलेभन्दा सन् ७०, ८० र ९० को दशकमा फिजीको स्वास्थ्य सेवा राम्रो रहेको भन्ने विश्व बैंकको प्रतिवेदनलाई उद्धृत गर्दै उनले आफ्नो सरकारले स्वास्थ्य सेवालाई विशेष प्राथमिकतामा राखेको पनि जानकारी दिए ।
द अस्ट्रेलिया टुडेका अनुसार उनले अबको पाँचदेखि सात वर्षमा फिजीको स्वास्थ्य प्रणाली ‘प्रथम स्तरको’ हुने पनि दाबी गरे । उनले देशभर रहेका अस्पताल र स्वास्थ्य सेवा केन्द्रको स्तरोन्नति र मर्मतमा सरकारले विशेष ध्यान दिइरहेको पनि जानकारी दिए ।
हाल अस्ट्रेलिया सरकारको सहयोगमा कदाभु क्षेत्रमा रहेको भुनिसा अस्पतालको स्तरोन्नति भइरहेको र राजधानी सुभामा रहेको कोलोनियल वार मेमोरियल अस्पतालको जिर्णोद्दारको काम पनि जारी रहेको उनको भनाइ छ । उनले हाल मुलुकभर २७ वटा स्वास्थ्य पूर्वाधार निर्माणको परियोजना सञ्चालन भइरहेको उक्त अवसरमा जानकारी दिए ।
