विराटनगर । जल तथा मौसम विज्ञान विभागले शुक्रबारसम्म देशका विभिन्न स्थानमा वर्षा जारी रहने पूर्वानुमान गरेको छ।
विभागका अनुसार शनिबारदेखि भने मौसम क्रमशः सुधार हुँदै जानेछ।हाल चितवन, काठमाडौं, नवलपुर, तनहुँ, गोरखालगायत क्षेत्रमा वर्षा भइरहेको छ।
पछिल्लो २४ घण्टामा बागमती, गण्डकी, लुम्बिनी, कर्णाली र सुदूरपश्चिमका अधिकांश स्थानमा मध्यम वर्षा भएको छ भने केही क्षेत्रमा भारी वर्षासमेत भएको विभागले जनाएको छ।
बुधबार पहाडी तथा हिमाली क्षेत्रमा वर्षाको सम्भावना बढी रहेको छ। बिहीबार वर्षा केही घट्ने भए पनि पूर्वी पहाडी क्षेत्रमा भारी वर्षा हुनसक्नेछ।
शुक्रबार पूर्वी क्षेत्र र सुदूरपश्चिममा भारी वर्षाको सम्भावना रहेको विभागको अनुमान छ।वर्षाको सम्भावनालाई ध्यानमा राख्दै विभागले बागमती, गण्डकी, लुम्बिनी, कर्णाली र सुदूरपश्चिममा पहेँलो चेतावनी जारी गरेको छ।
धान भित्र्याउने समय भएकाले किसानलाई मौसमको अवस्था बुझेर मात्र कृषि कार्य गर्न विभागले आग्रह गरेको छ।
