विराटनगर । कोशी राजमार्गअन्तर्गत विराटनगर महानगरपालिका-३ स्थित तिरुपति पेट्रोल पम्प अगाडि भएको दुर्घटनामा १ जनाको उपचारका क्रममा मृत्यु भएको छ ।
प्रहरीका अनुसार दूध फारमबाट कञ्चनबारीतर्फ आउँदै गरेको को ३४ प २४३४ नम्बरको मोटरसाइकल र कञ्चनबारीतर्फ नै आउँदै गरेको प्रदेश १–०२–०४४ प ९५७२ नम्बरको मोटरसाइकल ठोक्किएर आइतबार राति दुर्घटना भएको थियो ।
दुर्घटनामा ९५७२ नम्बरको मोटरसाइकल चालक विराटनगर–५ का ४२ वर्षीय नवीन खनालको मृत्यु भएको प्रहरीले जनाएको छ ।
गम्भीर घाइते भएका खनालको उपचारका क्रममा विराटनगरको नोबेल शिक्षण अस्पतालमा सोमबार दिउँसो मृत्यु भएको हो ।
खनाल लाइन्स क्लब अफ विराटनगर गुराँसका सदस्य हुन् ।
उनले विराटनगरमा मुनलाइट फोटो स्टुडियो सञ्चालन गर्दै आएका थिए ।
दुर्घटनामा अर्को मोटरसाइकलको पछाडि सवार भारत झारखण्ड घर भइ विराटनगर-६ रामपुरस्थित माइतीमा बस्दै आएकी २९ वर्षीया सपना दास घाइते भएकी थिइन् ।
उनको नोबेलमा उपचार भइरहेको छ ।
२४३४ नम्बरको मोटरसाइकलका चालक भारतको झारखण्डका ३४ वर्षीय राकेश रन्जनलाललाई नियन्त्रणमा लिएर प्रहरीले घटनाको अनुसन्धान सुरु गरेको छ ।
मोटरसाइकलको तीव्र गतिका कारण दुर्घटना भएको प्रहरीको भनाइ छ ।
