विराटनगर- ‘राष्ट्र, राष्ट्रियता, धर्म, सस्कृति र नागरिक बचाउ महाअभियान’ ले आफ्नो समूहमा आवद्धहरूलाई गणतन्त्र दिवसको अवसरमा बिहीबार हुने राजावादीको आन्दोलनमा सहभागी नहुन निर्देशन दिएको छ ।
काठमाडौंको तीनकुनेमा गत चैत १४ गते पत्रकार सुरेश रजक र यातायात मजदुर सविन महर्जनको ज्यान जाने गरी भएको घटनाका मुख्य आरोपीका रुपमा प्रहरी हिरासतमा रहेका प्रसाईं नेतृत्वको समूहले विज्ञप्ति निकालेर राजावादी आन्दोलनमा सहभागी नहुन निर्देशन दिएको हो ।
‘जेठ १५ गतेको आन्दोलन राप्रपा नेतृत्वमा भएकोले त्यसमा हाम्रो सहकार्य नरहेकोले सहभागी नहुन अनुरोधसहितको निर्देशन गर्दछौँ,’ महाअभियान केन्द्रीय संगठन विभागका सचिव प्रेमदीप लिम्बूद्वारा जारी विज्ञप्तिमा भनिएको छ, ‘कुनै घटना घटे (भए) महाअभियान जिम्मेवार नहुने प्रष्ट निर्णय गरिएको छ ।’
उनले संगठनका अध्यक्ष प्रसाईंलगायत गैरकानुनी रूपमा प्रहरी हिरासतमा रहेकाहरूको शीघ्र रिहाइको माग गर्दै माइतीघर मण्डलामा जारी ‘सत्याग्रह’ बिहीबार स्थगित गरिएको पनि बताएका छन् ।
‘सत्यग्रह आन्दोलन २०८२ जेठ १६ गतेबाट पुनः निरन्तर रूपमा माइतीघर मण्डलामा गरिने जानकारी गराउँदछौँ,’ विज्ञप्तिमा लेखिएको छ । प्रसाईं नेतृत्वको उक्त संगठनले जेठ १२ गतेदेखि माइतीघर मण्डलामा धर्ना सुरू गरेको थियो ।
