विराटनगर । मोरङको रतुवामाईमा आइतबार साँझ मोटरसाइकल दुर्घटना हुँदा एक जना महिलाको मृत्यु भएको छ ।
छोराले चलाएको मोटरसाइकल पछाडि बसेकी रतुवामाई नगरपालिका–५ की ४५ वर्षीया भवानी मेहताको मृत्यु भएको हो ।
आमबारीबाट उर्लाबारीतर्फ जाँदै गरेको प्रदेश १–०२–०४५ प ९०६० नम्बरको मोटरसाइकल साँझ ६ः४० बजेतिर रतुवामाई–६ त्रिवेणी चोकमा दुर्घटनामा परेको थियो ।
प्रहरीका अनुसार कुकुरलाई जोगाउन खोज्दा आफैं अनियन्त्रित भएर मोटरसाइकल दुर्घटनामा परेको हो ।
दुर्घटनामा मोटरसाइकलको पछाडि सवार मेहता गम्भीर घाइते भएकी थिइन् । उनलाई उद्धार गरेर उपचारका लागि रंगेली अस्पताल पठाइएको थियो ।
तर, अस्पताल पुर्याउनासाथ साँझ ७ः१० बजेतिर उनको मृत्यु भएको प्रहरीले जनाएको छ ।
प्रहरीका अनुसार दुर्घटनामा परेका बेला मोटरसाइकल मृतकका छोरा २३ वर्षीय रमेश मेहताले चलाएका थिए ।
दुर्घटनामा आमाको मृत्यु भए पनि मोटरसाइकल चालक छोरा भने सकुशल रहेको प्रहरीले उल्लेख गरेको छ ।
उनलाई नियन्त्रणमा लिएर इलाका प्रहरी कार्यालय रंगेलीले अनुसन्धान थालेको छ ।
