विराटनगर । कोशी प्रदेशको राजधानी विराटनगरमा ट्राफिक लाइटको उल्लघंन गरी सवारी–साधन चलाउनेहरूको संख्या दिनानुदिन बढ्दै गएको पाइएको छ ।
जिल्ला ट्राफिक कार्यालय, मोरङले दिएको तथ्यांक अनुसार विराटनगरमा ट्राफिक लाइट जडान गरेयता एक हजार भन्दा बढीले उल्लंघन गरेका छन् ।
ट्राफिक कार्यालय, मोरङका प्रमुख राजन लम्सालका अनुसार गत साउनयता विराटनगरका पाँच स्थानमा ट्राफिक लाइट सञ्चालनमा ल्याइएको छ ।
ट्राफिक व्यवस्थापनलाई सहज बनाउने उद्देश्यले विराटनगर महानगरपालिकाले विराटनगरका विभिन्न पाँच स्थानमा ट्राफिक लाइट जडान गरिएको थियो ।
विराटनगर–धरान ६ लेन सडकखण्डमा कञ्चनबारी, बरगाछी, घाँसचोक र रोडशेष चोक तथा मेनरोडमा तीनपैनी र जलजलामोडमा ट्राफिक लाइट सञ्चालनमा ल्याइएको छ ।
ती लाइटहरूको नियम उल्लंघन गर्नेहरूको संख्या बढे पनि सवारी दुर्घटना भने न्यूनीकरणको प्रक्रियामा देखिएको ट्राफिक इन्स्पेक्टर लम्साल बताउँछन् ।
ट्राफिक लाइट जडान गरेयता दुर्घटना जोखिम घट्नुका साथै सवारीसाधन आवजावतमा सहज भएको र क्रमश: ट्राफिक नियमको पालना भइरहेको उनको भनाइ छ ।
जिल्ला ट्राफिक प्रहरी कार्यालय मोरङका अनुसार विराटनगर महानगरपालिकाभित्र दैनिक करिब ९५ हजार सवारी साधन गुड्ने गरेका छन् ।
