विश्वका धनी व्यक्तिहरूको सूचीमा नेपालका विनोद चौधरीको स्थान कहाँ ?

विराटनगर । अहिलेको विश्वमा सबैभन्दा धनी व्यक्तिको रूपमा इलन मस्क छन् । फोर्ब्सले हालै सार्वजनिक गरेको दुई हजार नौ सय ३३ जना धनीको सूचीमा टेस्ला कार निर्माता कम्पनीका मालिक इलन मस्क पहिलो स्थानमा छन् ।

७ मार्च २०२५ सम्ममा रकेट निर्माता कम्पनी स्पेस एक्स, एक्स (ट्विटर)का समेत मालिक मस्कको सम्पत्ति तीन सय ४२ अर्ब डलर पुगेको छ । फोब्र्सले सन् १९८७ देखि नै यस्तो सूची तयार पार्दै आइरहेको छ । स्टक बजारमा सम्बन्धी व्यक्तिहरूको कम्पनीको मूल्य, विनिमय दर लगायतको आधारमा यस्तो सूची तयार पार्दै आएको छ ।

फोब्र्सले हरेक दिनको रियल टाइम तथ्यांक समेत तयार गर्छ । यस आधारमा पनि मस्क तीन सय ६२ अर्ब डलर सहित पहिलो स्थानमा छन् । ७ मार्चसम्मको आधारमा दोस्रो स्थानमा फेसबुकका मालिक मार्क जुकरवर्ग छन्। उनीसँग २ सय १६ अर्ब डलर बराबरको सम्पत्ति छ ।

तेस्रो स्थानमा अमेजनका संस्थापक जेफ बेजोज छन् । उनीसँग दुई सय १५ अर्ब डलर बराबर सम्पत्ति छ । भारतबाट सबैभन्दा धनीको सूचीमा अग्रस्थानमा मुकेश अम्बानी छन् । उनी यो सूचीको १८ औं स्थानमा छन् ।

रिलायन्स इण्डष्ट्रीजका मालिक अम्बानीलाई भारतबाट भने गौतम अदानीले पछ्याइरहेका छन् । ५६ अर्ब डलर सम्पत्ति सहित अदानी यो सूचीको २८ औं स्थानमा छन् ।

नेपालका एक मात्र अर्ब डलरपति व्यवसायी विनोद चौधरी यो सूचीको एक हजार सात सय ६३ औं स्थानमा छन् । उनको सम्पत्ति दुई अर्ब डलर बराबर छ ।