माध्यमिक शिक्षा परीक्षा (एसईई)को पहिलो दिन नै सिरहामा अंग्रेजी विषयको प्रश्न पत्र आउट भएको छ । सिरहाको गोलबजारस्थित कुनै परीक्षा केन्द्रबाट प्रश्नपत्र आउट भएको आशंका गरिएको छ ।
परीक्षा मर्यादित बनाउन यस वर्ष परीक्षा केन्द्रहरूमा मोबाइल तथा अन्य चिटिङ गर्ने समानमा प्रतिबन्ध लगाएको छ । तर पनि प्रश्नपत्र आउट भएपछि राष्ट्रिय परीक्षा बोर्ड आलोचित हुन थालेको छ ।
परीक्षा सुरु भएको केहीबेरमै प्रश्नपत्र आउट भए पनि कुन परीक्षा केन्द्रबाट आउट भएको कुरा खुल्न सकेको छैन । सिरहा जिल्ला परीक्षा समन्वय समितिका संयोजक तथा प्रमुख जिल्ला अधिकारीको बासुदेव दाहालले भने गोलबजार तिरका कुनै परीक्षा केन्द्रबाट प्रश्नपत्र आउट भएको आशंका गरेका छन् ।
शब्द एक्सप्रेससँग फोन संवाद गर्दै उनले आफ्नो जिल्लाबाट प्रश्नपत्र आउट हुन नसक्ने दाबी समेत गरेका छन् । मोबाइलको जमाना रहेका कारण अरू जिल्लातिर भएको घटना पनि सिरहातर्फ औंल्याइदिएको हुन सक्ने अनुमान उनको छ ।
आफ्नो जिल्लामा मर्यादित र शान्त वातावरणमा परीक्षा गराउन दौरा सुरुवालमा सुरक्षाकर्मी खटाइएको दाबी गर्दै उनले आफू स्वयमले एउटा परीक्षा केन्द्रमा अनुगमन तथा निरीक्षण गरेको समेत सुनाए ।
परीक्षा ‘टाइट’ भएका कारण पनि सिरहामा प्रश्नपत्र आउट भएको विषयमा हल्ला फिँजाइएको तर्क उनको छ ।
