विराटनगर । देशकै नमुना खानेपानी आयोजनाका रूपमा चिनिएको मानगढ खानेपानीको चुनाव पुनः हुने भएको छ ।
उच्च अदालत विराटनगरले विराटनगरस्थित विराट खानेपानी तथा सरसफाइ उपभोक्ता संस्थाअन्तर्गतको मानगढ खानेपानी आयोजनाको निर्वाचन पुनः गराउन आदेश दिएको हो ।
उच्च अदालत विराटनगरका न्यायाधीश ध्रुवराज नन्द र विष्णुप्रसाद अर्यालको संयुक्त इजलासले मानगढ खानेपानी आयोजनाको नयाँ नेतृत्वका लागि पुनः निर्वाचन गर्न रिट जारी गरेको हो ।
उच्च अदालत विराटनगरका रजिष्ट्रार जगदिशप्रसाद भट्टका अनुसार जेठ १९ गते बिहान ९ बजेको अवस्थाबाट पुनः प्रक्रिया सुरु गर्न रिट जारी भएको हो ।
अब, पुरानै उम्मेदवारबाट नेतृत्व चयनका लागि मतदान पुन: हुनेछ ।
मानगढ खानेपानी आयोजनाको मतदान रद्द गरी पुन: निर्वाचन गराउन माग राख्दै उच्च अदालत, विराटनगरमा रिट निवेदन परेको थियो ।
विराटनगरका तीन जना उपभोक्ता यज्ञप्रसाद खतिवडा, टंकप्रसाद खतिवडा र भरत कार्कीले १० जनालाई विपक्षी बनाएर गत जेठ २५ गते उच्च अदालतमा रिट निवेदन दर्ता गराएका थिए ।
नयाँ नेतृत्व चयनको लागि भएको मतदान रद्द गरी पुनः निर्वाचन समिति गठन गरेर मात्रै निर्वाचनको प्रक्रिया सुरु गर्न माग राख्दै उनीहरूले रिट निवेदन दर्ता गराएका थिए ।
गत जेठ १९ गते विराट खानेपानी तथा सरसफाइ उपभोक्ता संस्थाको नयाँ नेतृत्वका लागि निर्वाचन भएको थियो ।
वर्तमान अध्यक्ष रामबहादुर घिमिरे र लालमणि भट्टराई अध्यक्षका उम्मेदवार थिए । दुवै जना नेकपा (एमाले)मा आबद्ध छन् ।
खानेपानीको निर्वाचनमा एमाले मोरङ नेतृत्व २ धारमा बाँडिएको थियो ।
खानेपानी निर्वाचनकै विवादका कारण तत्कालीन महानगर अध्यक्ष सागर थापाको जिम्मेवारी खोसिएको थियो ।
अहिले थापा एमाले मोरङ जिल्लाको उपाध्यक्षमा निर्वाचित भइसकेका छन् ।
पाँच हजार नौ सय घरधुरी सदस्य रहेको खानेपानी व्यवस्थापनका लागि मतदान हुँदा सबै मतदाताले मत हाल्न पाएका थिएनन् ।
मतदान भइरहेको बेला साँझपख मतदानस्थलमा भएको विवादले मतदान प्रकिया नै भाँडिएको थियो ।
अध्यक्ष पदका उम्मेदवार रामबहादुर घिमिरे पक्षले धाँधली गर्न खोजेको भन्दै अर्को पक्षले मतदानस्थलमा होहल्ला गरेपछि अन्तिम समयमा मतदान रोकिएको थियो ।
मतदान गर्न नपाएका सदस्यका लागि जेठ २० गते समय तोकिए पनि विवादका कारण मतदान भएको थिएन ।
खसेको मतलाई गणना गर्नुपर्ने माग राख्दै दिव्यराज कट्टेलसमेत ३ जना उच्च अदालत पुगेका थिए ।
टंकप्रसाद खतिवडासमेत ३ जना पुनः मतदानको मागसहित अदालत पुगेका थिए ।
अन्तिम सुनुवाइका क्रममा सोमबार उच्च अदालतले कट्टेलसहित ३ जनाको रिट खारेज गरेको छ ।
खतिवडासहितको मागदाबी अनुसार नयाँ नेतृत्वका लागि निर्वाचन गर्न अदालतले रिट जारी गरेको हो ।
