बाग्लुङ । कालीगण्डकी नदीमा अवैध रूपमा करेन्ट लगाएर माछा मार्ने चार जनालाई प्रहरीले पक्राउ गरेको छ ।
आइतबार राति साढे १० बजे बागलुङ नगरपालिका-४ ढोडेनीस्थित कालीगण्डकी नदी किनारमा माछा मारिरहेको अवस्थामा उनीहरू पक्राउ परेका हुन् ।
पक्राउ पर्नेहरूमा पर्वतको जलजला गाउँपालिका-८ का ३४ वर्षीय गोकुल गौतम, सोही ठाउँका ३० वर्षीय किस्मत पुन, ३७ वर्षीय दिलबहादुर मगर र वडा नं. ७ का आर्यन शर्मा रहेका छन् ।
पक्राउ पर्नेहरूको साथबाट प्रहरीले माछा मार्न प्रयोग गरिएको १२ भोल्टको ब्याट्री, सेतो तार बेरिएको आल्मुनियमको स्ट्रिक दुई थान, जालीसहितको कुँडुलो दुई थान बरामद भएको प्रहरीले जनाएको छ ।
पक्राउ पर्नेहरूलाई जलचर संरक्षण ऐन, १०१७ अन्तर्गतको कसूरमा कारबाहीका लागि सोमबार जिल्ला प्रशासन कार्यालय बागलुङमा पठाइएको छ ।
जलचर संरक्षण ऐन अनुसार कुनै समात्ने वा मार्ने अभिप्रायले जानि जानि जलमा वा त्यसको आसपासमा कुनै किसिमको विद्युतीय धार, विष्फोटक पदार्थ वा विशालु पदार्थको प्रयोग गर्नु हुँदैन भन्ने व्यवस्था रहेकाले कोही–कसैले माछा मार्ने उदेश्यले खोला नदीमा करेन्ट नलगाउनसमेत प्रहरीले सर्वसाधारणलाई आग्रह गरेको छ ।
