भैरहवा । भारतमा मृत्यु भएकी भैरहवाकी विद्यार्थी प्रकृति लम्सालको अन्त्येष्टि गरिएको छ ।
बुधबार राति नेपाल ल्याइएकी प्रकृतिको बिहीबार सिद्धार्थनगर नगरपालिका–८ स्थित बैंक कोलोनी घरमा रातभर राखेर बिहान स्वर्गद्वारी घाटमा अन्त्येष्टि गरिएको हो ।
लम्साललाई उनका हजुरबुवा ७६ वर्षीय देवनाथ लम्सालले दागबत्ती दिएका थिए । प्रकृतिको अन्त्येष्टिमा सयौँ स्थानीय सहभागी भएका थिए ।
सुरक्षा अधिकारीहरू, उद्योगी–व्यवसायी, स्थानीय तहका जनप्रतिनिधिहरूको सहभागिता थियो ।
भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयमा अध्ययनरत प्रकृतिको त्यहाँ मृत्यु भएको थियो ।
ओडिसाको राजधानी भुवनेश्वरस्थित केआईआईटी विश्वविद्यालयको कलेजमा बी–टेक अध्ययन गरिरहेकी प्रकृति गत आइतबार होस्टेलको कोठामा झुन्डिएको अवस्थामा मृत फेला परेकी थिइन् ।
सोही कलेजमा अध्ययनरत भारतकै विद्यार्थी अडिवक श्रीवास्तवले दिने गरेको मानसिक यातनामा कजेल प्रशासन मौन रहनु प्रकृतिको मृत्युको कारण भएको भारतीय मिडियाहरूले उल्लेख गरेका छन् ।
प्रकृतिका आफन्त सिद्धान्त सिग्देलले कलेज प्रशासनलाई अड्विक श्रीवास्तवले पटक पटक दिइरहेको मानसिक यातनाबारे प्रमाणसहित दुई पटक उजुरी दिँदा पनि कुनै सुनुवाइ नभएको बताएका छन् ।
प्रकृतिको शव बुधवार राति ११ बजे गृह जिल्ला रुपन्देही ल्याइएको थियो । प्रकृतिको शव घरमा ल्याउँदा आफन्त र त्यहाँ उपस्थित स्थानीय भावविह्वल भएका थिए ।
पारिवारिक स्रोतका अनुसार प्रकृतिको शव बुधवार ओडिसाबाट गोरखपुरसम्म हवाईजहाजमा र गोरखपुरबाट घरसम्म गाडीमा ल्याइएको थियो ।
जिल्ला प्रहरी कार्यालय रुपन्देहीका सूचना अधिकारी डिएसपी सुरज कार्कीले राति अन्त्येष्टि गरिएको र अहिले यहाँको स्थिति सामान्य रहेको बताए ।
