रसुवा ।रसुवाको भोटेकोशी नदीमा आएको बाढीबाट प्रभावितका लागि विश्व स्वास्थ्य सङ्गठन (डब्ल्युएचओ)ले आवश्यक औषधि तथा स्वास्थ्य उपकरण पठाउने भएको छ।
स्वास्थ्य तथा खाद्य स्वच्छतामन्त्री निशा मेहतासँगको कुराकानीपछि डब्ल्युएचओले करिब एक हजार जनालाई पुग्ने आधारभूत औषधि तथा स्वास्थ्य उपकरण प्रभावित क्षेत्रमा पठाउन लागेको स्वास्थ्य मन्त्रालयले जनाएको छ। साथै, २४ वर्गमिटरका १५ वटा आपत्कालीन टेन्टसमेत पठाउने तयारी गरिएको छ।
बाढी प्रभावितको उपचारका लागि काठमाडौंस्थित वीर अस्पताल र ट्रमा सेन्टरमा १०० वटा आपत्कालीन शय्या छुट्याइएको मन्त्रालयले जनाएको छ। हालसम्म तीन जना घाइतेलाई उद्धार गरी काठमाडौं ल्याइएको छ।
आपत्कालीन स्वास्थ्य सेवा प्रभावकारी बनाउन संघीय अस्पताल, रक्तसञ्चार केन्द्र, बागमती तथा गण्डकी प्रदेशका स्वास्थ्य मन्त्रालय, नेपाल रेडक्रस, लायन्स र नेपाल स्काउटसँग समन्वय भइरहेको मन्त्रालयले जनाएको छ।
नेपाल रेडक्रस र नेपाल स्काउटमार्फत चिकित्सक तथा स्वास्थ्यकर्मी प्रभावित क्षेत्रमा पठाउने तयारी भइरहेको छ। यसैबीच, ट्रमा सेन्टरमा कार्यरत छ जना चिकित्सक र दुई जना नर्सलाई प्रभावित क्षेत्रमा पठाइसकिएको मन्त्रालयले जनाएको छ।
आवश्यक स्वास्थ्य उपकरणसहित एउटा एम्बुलेन्स पनि प्रभावित क्षेत्रतर्फ पठाइसकिएको छ। साथै, रसुवाको धुन्चेस्थित स्वास्थ्य चौकी र रसुवा अस्पतालसँग समन्वय गरी स्वास्थ्य सेवा व्यवस्थापन भइरहेको मन्त्रालयले जनाएको छ।
आपत्कालीन स्वास्थ्यसम्बन्धी सहयोग, जानकारी तथा समन्वयका लागि १११५ मा सम्पर्क गर्न सकिने स्वास्थ्य मन्त्रालयले जनाएको छ।
