काठमाडौं । आगामी भदौ २३ र २४ गते सरकारविरुद्ध पुनः आन्दोलन हुने भन्दै सामाजिक सञ्जालमा फैलिएका सूचना असत्य र भ्रामक रहेको जेनजी अभियन्ता रक्षा बमले स्पष्ट पारेकी छन्।
आफ्नो तस्बिर प्रयोग गरेर आन्दोलनसम्बन्धी गलत सूचना फैलाइएको भन्दै बमले सामाजिक सञ्जालमार्फत आपत्ति जनाएकी हुन्। उनले प्रस्तावित भनिएको आन्दोलनसँग आफ्नो र ‘जेनजी फ्रन्ट’को कुनै सम्बन्ध नरहेको स्पष्ट पारेकी छन्। रक्षा बमको नेतृत्वमा ‘नेपाल जेनजी फ्रन्ट’ गठन भएको सार्वजनिक विवरणसमेत यसअघि आएको थियो।
भदौ २३ र २४ गते भएका घटनाको पीडा र क्षति अझै ताजै रहेको भन्दै उनले गम्भीर विषयलाई मजाक र सनसनी फैलाउने माध्यम नबनाउन आग्रह गरेकी छन्।
बमले आफूहरू शान्तिको पक्षमा रहेको र अहिले सरकारविरुद्ध आन्दोलन गर्नुपर्ने अवस्था नरहेको बताएकी छन्। साथै, आफ्नो नाम तथा तस्बिर दुरुपयोग गरी भ्रामक सूचना नफैलाउन र संवेदनशील विषयमा जिम्मेवार बन्न सबैलाई अपिल गरेकी छन्। पछिल्लो समय पनि बमले जेनजी आन्दोलनका घटनाबारे सत्यतथ्य सार्वजनिक हुनुपर्ने धारणा राख्दै आएकी छन्।
