धरान । सुनसरीको धरान उपमहानगरपालिकामा सामाजिक सद्भाव भड्काएको आरोपमा एक महिला पक्राउ परेकी छन् ।
प्रहरीले धरान उपमहानगरपालिका-८ भोटेपुलकी ३६ वर्षीया सिर्जना बेघालाई बुधबार पक्राउ गरेको हो ।
सामाजिक सञ्जाल फेसबुकबाट सामाजिक सद्भाव भड्काएको, अवैध चन्दा असुली कार्यमा संलग्न भएको, सार्वजनिक स्थलमा गोरू काटेर भोज खाएको, सार्वजनिक सम्पत्तिको तोडफोड गरेको भिडियो खिचेर सामाजिक सञ्जालमा हालेको आरोपमा उनी पक्राउ परेकी हुन् ।
प्रहरीले बेघालाई आज धरानको अमरहाट बजारबाट पक्राउ गरेको हो ।
सामाजिक सद्भाव भड्काएको र अवैध चन्दा असुलीको कार्यमा संलग्न भएको आरोपमा आरोपितलाई अनुसन्धानका लागि गिरफ्तार गरिएको इलाका प्रहरी कार्यालय, धरानका डिएसपी प्रकाश जवेगुले बताए ।
आरोपितले सामाजिक सञ्जालमा प्रहरीले आफै मिथ्था कुरा राखेर आफूलाई फसाउन खोजेको र सोही आधारमा गिरफ्तार गरेको बताएकी छन् ।
जिल्ला अदालतबाट पक्राउ पूर्जी जारी भएपछि बेघालाई गिरफ्तार गरिएको र घटनाका विषयमा अनुसन्धान थालिएको प्रहरीले जनाएको छ ।
