विराटनगर । गोल गरेको १५ मिनेटमा फेर्मिन लोपेजले रातो कार्ड खाएर १० खेलाडीमा सीमित भएको बार्सिलोनाले सेभियामाथि उसकै मैदानमा ४-१ को फराकिलो जित निकालेको छ ।
स्पेनिस ला लिगामा यो जितसँगै बार्सिलोनाले शीर्ष स्थानको रियल मड्रिडसँग मात्र २ अंकको दूरीमा झार्न सफल पनि भएको छ ।
पहिलो हाफको सातौँ मिनेटमा रोवर्टो लेवान्डोस्कीको गोलमा बार्सिलोनाले सुरुवाती अग्रता बनाएको थियो ।
तर त्यसको एक मिनेटमै बार्सिलोनाले गोल खाएको थियो । बार्सिलोनाले गोल गरेको १ मिनेटपछि नै रुवेन भार्गसले सेभिल्लालाई बराबरीमा ल्याएका थिए ।
वैकल्पिक खेलाडीको रुपमा मैदान छिरेका फर्मिनले दोस्रो हाफको सुरुवातमा नै गोल गर्दै बार्सिलोनालाई पुनः अग्रता दिलाएका थिए ।
उनी पहिलो हाफको ३८ औँ मिनेटमा गाभीको स्थान लिदै मैदान छिरेका थिए । तर ६२ औँ मिनेटमा सीधै रातो कार्ड खाँदै मैदान छाडे ।
त्यसअघि खेलको ५५ औँ मिनेटमा राफिन्हाको गोलमा बार्सिलोनाले अग्रता फराकिलो पारेको थियो । खेलको ८९ औँ मिनेटमा इरिक गार्सियाको गोलमा बार्सिलोनाले ४–१ को जित दर्ता गर्यो ।
रियल मड्रिड ५० अंकमा शीर्ष र एट्लिको मड्रिड ४९ अंकमा दोस्रो स्थानमा छ ।
गएराति भएको अन्य खेलमा रियल सोसिडाडले स्प्यानोललाई २–१ ले हरायो । भ्यालेन्सियाले लेगेनासमाथि २–० ले तथा गेटाफेले डिपोर्टिभो अल्भेसमाथि १-० को जित दर्ता गर्यो ।
